Փաստ ինֆո

Դեկտեմբերի 2-ին զորամասի մարտական դիրքում սպանված պարտադիր ժամկետային Արթուր Աջամյանի հարազատները պահանջում են հանդիպում ՀՀ վարչապետ Նիկոլ Փաշինյանի հետ։

Նշենք, որ նրանց հաջողվել է Կառավարության շենք մտնել, բայց վարչապետի հետ հանդիպել չի հաջողվել։ Արթուր Աջամյանի պապը լրագրողներին հայտնեց, որ պետք է սպասեն վարչապետին՝ Կառավարության շենքի մոտ։ Աջամյանի հորեղբայրը և պապը հայտնեցին լրագրողներին, որ հանդիպել են Քննչական կոմիտեի մեկ-երկու քննիչի հետ, սակայն չմանրամասնեցին, թե ինչ են զրուցել։
Ավելի վաղ տեղեկացրել ենք, որ Դեկտեմբերի 2-ին զորամասի մարտական դիրքում սպանված պարտադիր ժամկետային Արթուր Աջամյանի հարազատները բողոքի ակցիա են իրականացնում Կառավարության շենքի մոտ։

Հիշեցնենք, որ զինվորն սպանվել է 2019թ. դեկտեմբերի 2-ին՝ վաղ առավոտյան։ Պաշտոնական հաղորագրության համաձայն, ժամը 06:50-ի սահմանում, ՊԲ հյուսիս-արևելյան ուղղությամբ տեղակայված զորամասերից մեկի պահպանության տեղամասում, մահացու հրազենային վիրավորում է ստացել ՊԲ զինծառայող, 1998թ. ծնված Արթուր Իշխանի Աջամյանը, իսկ զինծառայող, 1999թ. ծնված Դավիթ Հարությունի Մելիքբեկյանը վիրավորվել է: Քննչական կոմիտեն դեպքի առթիվ քրեական գործ է հարուցել սպանության հատկանիշներով՝ ՀՀ քրեական օրենսգրքի 34-104-րդ հոդվածի 2-րդ մասի 1-ին կետով /երկու կամ ավելի անձանց սպանության փորձ/։ Այսինքն՝ նպատակը եղել է երկու անձի սպանությունը։ Վիրավոր զինվորի կյանքի համար բժիշկները պայքարում են։
Մամուլում շրջանառության մեջ էր դրվել` զինվորի կողմից ծառայակցին սպանելու փորձ կատարելու, ապա ինքնասպանություն գործելու վարկածը, ինչը վրդովմունք էր առաջացրել մահացած զինծառայողի ծնողների, հարազատների մոտ, որոնք բողոքի ակցիա էին իրականացրել Աժ-ի մոտ` պահանջելով պարզել իրենց որդուն սպանողին. Նրանք հավատացած են, որ սպայական անձնակազմը շատ լավ գիտի, թե ինչ է տեղի ունեցել իրականում:

Հեղինակ՝ Իզաբել Սահակյան

Աղբյուր` Փաստինֆո