Փաստ ինֆո

Հայաստանի նախագահ Արմեն Սարգսյանն այսօր ստորագրեց «Սահմանադրական դատարանի մասին» օրենքում լրացումներ կատարելու մասին օրենքը, ըստ էության՝ «հանցակից» դառնալով հրաժարականի դիմաց հարկատուների միջոցներով ՍԴ դատավորներին տարեկան ավելի քան 12 միլիոն դրամ թոշակ տրամադրելու գործարքին:

Ըստ այս օրենքի, Սահամանադրական դատարանի այն դատավորները, որոնք մինչև հունվարի 31-ը վայր կդնեն իրենց լիազորություններ և կդադարեն գլխացավանք լինել Հայաստանի իշխանության համար, Հայաստանի պետբյուջեից մինչև իրենց պաշտոնավարման ժամկետի ավարտը կլորիկ աշխատավարձ, հավելավճար և այլ արտոնություններ կստանան:

Այս աբսուրդային օրենքը բուռն քննադատության ենթարկվեց խորհրդարանական ընդդիմության, մասնագիտական շրջանակների կողմից: «Լուսավոր Հայաստան» և ԲՀԿ խմբակցությունների պատգամավորները հիմնավոր փաստարկներ ներկայացրեցին՝ բացատրելով, որ սա պետական միջոցների մսխում է և իշխանության կողմից իրեն հպատակ դատարանի կազմ ձևավորելու նպատակ է հետապնդում: Ավելին՝ օրենքի հեղինակներն այն անգամ կարծիքի չեն ուղղարկել Սահմանադրական դատարան՝ արհամարհելով դատավորների դիրքորոշումը:

Բայց այս հանգամանքը չխանգարեց, որպեսզի նախագահ Արմեն Սարգսյանը լուռ կատարի իշխող մեծամասնության «կապրիզների» դակիչի իր դերը: Նույն Արմեն Սարգսյանը 2018թ.-ի հոկտեմբերի 2-ին ԱԺ կողմից ընդունված օրենքը, Նիկոլ Փաշինյանի և նրա թիմակիցների ճնշման ներքո, չստորագրեց՝ ուղարկելով Սահմանադրական դատարան, իսկ երբ ՍԴ-ն վերահաստատեց, որ օրենքում ոչ մի հակաօրինական դրույթ չկա, Արմեն Սարգսյանը առանց ներողություն խնդրելու ստորագրեց այն՝ չէ որ Փաշինյանն արդեն թույլատրել էր իրեն դա անել:

Իսկ ի՞նչն էր խանգարում, որպեսզի ՀՀ նախագահը ՍԴ դատավորների վաղաժամ թոշակի ուղարկելու այս նախագիծն էլ ուղարկեր ՍԴ: Պատասխանը պարզ է՝ իր գոյություն չունեցող լեգիտիմությունը:

Բոլորս հիշում են, որ 2018թ.-ին ՀՀԿ-ի կողմից նախագահ առաջադրված և ընտրված Արմեն Սարգսյանին շատերը և հատկապես իր այսօրվա «թիմակիցները» մեղադրում էին ոչ լեգիտիմ նախագահ լինելու մեջ, քանի որ Արմեն Սարգսյանը, ըստ օրենքի, պետք է Մեծ Բրիտանիայի քաղաքացիությունից դուրս եկած լիներ 2011թ.-ին, մինչդեռ, ըստ օդում կախված լուրերի, նա դուրս է եկել 2013թ.-ին միայն: Այսինքն՝ նրա պաշտոնավորումն ապօրինի է:

2018թ.-ին դեռ ընդդիմադիր պատգամավոր Նիկոլ Փաշինյանը ԱԺ ամբիոնից, իր պնդման, «ոչնչացրեց» Արմեն Սարգսյանին՝ պահանջելով հրապարակել իր քաղաքացիությունից հրաժարվելու փաստաթուղթը և պնդեց, որ եթե այն գոյություն ունենար, վաղուց հրապարակած կլինեին:

«Կարծում եմ՝ Արմեն Սարգսյանը, որպես նախագահի թեկնածու, ոչնչացվել է: Բնականաբար, որպես նախագահ՝ առավել ևս ոչնչացված է: Նա չի կարող որևէ լուրջ գործունեություն ծավալել և նա չի կարող որևէ օգուտ տալ Հայաստանի Հանրապետությանը, որովհետև ստի վրա չի կարելի կառուցել ճշմարտություն, ստի վրա չի կարել չի կառուցել առաքինություն, և Արմեն Սարգսյանն ընդամենը Սերժ Սարգսյանի ստեղծած ստահոդ պետության մի մարիոնետ է»,- 2018.թ-ի ապրիլի 9-ին «Ազատության»-ը տված հարցազրույցում ասել է Նիկոլ Փաշինյանը:

Այս հարցազրույցից շուրջ 20 օր անց Արմեն Սարգսյանին «մարիոնետ» անվանած Նիկոլ Փաշինյանը իր ֆեյսբուքյան էջում հայտնեց Արմեն Սարգսյանի հետ հանդիպման մասին՝ հավելելով, թե «պարոն Սարգսյանը իր հետ բերել էր նաև փաստաթղթեր այն մասին, որ ինքը Մեծ Բրիտանիայի քաղաքացիությունը կորցրել է 2011 թվականի դեկտեմբերին»:

Այսպիսով՝ վարչապետ դարձած Նիկոլ Փաշինյանը Հայաստանի ամբողջ հանրապետությունում միակ մարդն է, որն իր աչքով տեսել է, ըստ օդում կախված լուրերի, գոյություն չունեցող, «փաստաթուղթն» առ այն, որ Արմեն Սարգսյանը Մեծ Բրիտանիայի քաղաքացիությունը կորցրել է 2011 թվականի դեկտեմբերին:

Նիկոլ Փաշինյանն իր պաշտոնավարման առաջին իսկ օրից փաստացի ականապատեց Արմեն Սարգսյանի շրջակայքը և «մարիոնետի» պես բանեցնում է նրա՝ իր ձեռքում պահելով նրա լեգիտիմության ականը: Ինչպես տեսնում ենք Արմեն Սարգսյանը լավ էլ համակերպվել է Նիկոլ Փաշինյանի մարիոնետի կարգավիճակին:

Աղբյուր` Փաստինֆո