Փաստ ինֆո

Դատախազն արդեն իր որոշումը կայացրել է «Հոկտեմբերի 27»-ի հետ կապված, և այդ որոշում նշանակում է սկսել գործողություններ, որոնց պետք է սկզբում պատրաստվել, հետո իրականացնել։ Լրագրողների հետ հանդիպման ժամանակ այս մասին ասել է ԱԺ պաշտպանության և անվտանգության հարցերով մշտական հանձնաժողովի նախագահ Անդրանիկ Քոչարյանը՝ անդրադառնալով գլխավոր դատախազի այն որոշմանը, որի համաձայն կվերսկսվի «Հոկտեմբերի 27»-ի գործով կարճված վարույթը։

Հիշեցնենք, որ ԱԺ նախկին պատգամավոր Անահիտ Բախշյանը դիմել էր գլխավոր դատախազին՝ «Հոկտեմբերի 27»-ի գործը կարճելու դեմ բողոքով, որի պատասխանը դատախազը բավարարել է։

Անդրանիկ Քոչարյանը նկատեց, որ հասարակությունը սպասում է «Հոկտեմբերի 27»-ի բացահայտման հնարավոր իրողություններին. «Տեսնում ենք՝ Մարտի 1-ն ինչ ծավալով է գնում և Ռոբերտ Քոչարյանի պաշտպանական կողմն ինչպիսի ջանասիրությամբ է փորձում դատաքննությունը կասեցնել, հեռացնել անորոշ ժամանակով, որպեսզի այդ գործընթացը շարունակաբար անորոշության մեջ մնա»,-նշեց Անդրանիկ Քոչարյանը՝ ընդգծելով, որ դրան կմիանա նաև «Հոկտեմբերի 27»-ն իր բոլոր դժվարություններով։

Անդրանիկ Քոչարյանն ընդգծեց՝ պետք է մտածել նաև նախաքննական մարմնի կարողությունների և քննչական խմբի ուժեղ կազմ ունենալու մասին. «Շատ տարիներ են անցել և հիմնական, կարևոր վկաների մեծ մասն անհասկանալի պայմաններում մահացել է։ Բայց կան նաև շատ ավելի կարևոր վկայություններ տվողներ, բայց կարևոր վկայությունների մեջ ես միայն չեմ տեսնում Նաիրի Հունանյանի ներկայությունը»,-ասաց Անդրանիկ Քոչարյանը՝ հավելելով, որ այստեղ շատ ավելի խորքային գործընթաց պետք է սկսվի։

Մանրամասները՝ տեսանյութում

Աղբյուր` Փաստինֆո