Փաստ ինֆո

««Հոկտեմբերի 27»-ի գործի կապակցությամբ անորոշ տեղեկություններ սկսեցին ի հայտ գալ, նախ եւ առաջ գործը քննած դատավորի՝ Հայաստանը լքելու հետ կապված: Սա արդեն խոսում է այն մասին, որ «Հոկտեմբերի 27»-ի գործը կարող է վերաբացվել։ Ավելին, եթե հիշում ենք, պատգամավորներից մեկը գնաց «Հոկտեմբերի 27»-ի հիմնական մեղավորի մոտ՝ բանտախուց, իսկ դա կարող էր լինել միայն վարչապետի թույլտվությամբ, որովհետեւ երկրում այնպիսի իրավիճակ է, որ առանց նրա դաբրոյի ոչ ոք նման քայլ չէր անի»,-«Փաստինֆո»-ի հետ զրույցում ասաց քաղտեխնոլոգ Արմեն Բադալյանը՝ անդրադառնալով «Հոկտեմբերի 27»-ի գործը կարճելու որոշման դեմ բողոքի բավարարմանը:

Ըստ Բադալյանի, ակնհայտ երեւում է, որ վերջին 2 ամիսների ընթացքում այս գործի շուրջ զարգացումներ են սկսվել: «Սա արդեն ֆիքսում ենք, որ ինչ-որ գործընթաց սկսվել է, բայց ինչ վերաբերում է մթնոլորտին, ապա երկրում տիրող հասարակական-քաղաքական մթնոլորտն ընդհանրապես բարենպաստ չէ այդ գործը վերաբացելու համար: Ինչպես վարչապետն էր ասել հանրահավաքի ժամանակ, երկրում չկա որեւէ դատավոր , որ նրա կամքին դեմ լինի, հիշում չէ՞, իսկ դա նշանակում է, որ դատավորը վարչապետի ցանկության դեմ չի կարող լինել, իսկ «Հոկտեմբերի 27»-ը տեղի է ունեցել 2-րդ նախագահի կառավարման տարիներին, ով այս պահին կալանավորված է եւ հայտնի է վարչապետի վերաբերմունքը նրա կալանավորման հետ կապված գործընթացին, գիտենք, թե ինչ եղավ դատավորի հետ, ով համարձակվեց այդ գործով ՍԴ դիմել»,-ասաց քաղտեխնոլոգը՝ շեշտելով, որ ի սկզբանե այստեղ եւս քաղաքական գործընթացի հետ ենք առնչվելու, այնպես, ինչպես սահմանադրական կարգի ենթադրյալ տապալման հետ կապված գործն այլեւս իրավական չէ:

Հիշեցնենք, որ ԱԺ նախկին պատգամավոր Անահիտ Բախշյանը դիմել էր գլխավոր դատախազին՝ «Հոկտեմբերի 27»-ի գործը կարճելու դեմ բողոքով, որի պատասխանը դատախազը բավարարել է։ Իսկ ավելի վաղ ԱԺ պատգամավոր Արման Բաբաջանյանը հանդիպել եւ զրուցել էր ոճրագործության պարագլուխ Նաիրի Հունանյանի հետ, ինչը ոչ միանշանակ ընդունվեց հասարակական-քաղաքական շրջանակների կողմից:

«Բնականաբար «Հոկտեմբերի 27»-ի գործի վերաբացումը եւս լինելու է քաղաքական գործընթաց, թե այն ինչպես կարող են օգտագործել, դա արդեն կախված է վարչապետից, գուցե նաեւ այլ շրջանակներից՝ աշխարհաքաղաքական: Սրան գումարած գործը քննած դատավորի՝ կասկածելի հանգամանքներում Հայաստանը լքելը , առավել եւս տեղեկություն եղավ ոստիկանության կողմից, որ նրա ճամպրուկում փամփուշտ են հայտնաբերել, ինչը խիստ կասկածելի է, որովհետեւ մարդը, որը ցանկանում է լքել երկիրը եւ գիտի , որ 5 վայրկյանից հետո կարող է կալանավորվել, հավատացեք, անգամ փողոցը կարմիր լույսի տակ չի անցնի, իսկ նման իրավիճակում, երբ հայտարարում են, որ նրա ճամպրուկում փամփուշտ կա, նշանակում է, որ նա մի կերպ երկրի սահմանը անցնում է, որ գնա ՌԴ մաքսային ծառայությունը իրեն որպես ահաբեկիչ ՌԴ-ում կալանավորեն, ուղղակի ծիծաղելի է: Այստեղ ինչ-որ մութ գործարք է տեղի ունեցել»,-ասաց Արմեն Բադալյանը:

Ըստ քաղտեխնոլոգի, ավելի մեծ, անգամ աշխարհաքաղաքական գործընթաց է սկսվում, որը միանշանակ է:

Ինչ վերաբերում է փաստին, որ Ռոբերտ Քոչարյանի դեմ հարուցված քրեական գործը որեւէ արդյունք չի տալիս, քաղտեխնոլոգն ասաց.«Այս գործը Մարտի 1-ի սպանությունների հետ կապ չունի, սա քաղաքական գործընթաց է եւ տեղում դոփում է: «Հոկտեմբերի 27»-ի գործի պարագայում մի կողմից սլաքները կարող են ուղղվել 2-րդ նախագահի կողմը, այս գործը եւս նրան կապելու, որովհետեւ մենք չգիտենք, թե Վենետիկի հանձնաժողովից եւ ՄԻԵԴ-ից սահմանադրական կարգի տապալման մեղադրանքի հոդվածի սահմանադրականության հետ կապված ինչ արձագանք կգա, դրա համար իշխանությունը փորձում է 2-րդ գործը բացել, որը սակայն կարող է պահուստային տարբերակ լինել ոչ միայն 2-րդ նախագահի դեմ, այլեւ արտաքին ուղղվածություն ունենա: Գաղտնիք չէ, որ «Հոկտեմբերի 27»-ի դեպքում հակառուսական գործոնը մշտապես խաղարկվել է: Այնպես, որ այստեղ աշխարհաքաղաքական ենթատեքստ կա եւ սա դատական գործընթաց չի կարող լինել»,-եզրափակեց Արմեն Բադալյանը:

Աղբյուր` Փաստինֆո