Փաստ ինֆո

Կառավարությունն այսօրվա նիստում որոշեց հնարավորություն  տալ ընտանեկան կամ սոցիալական նպաստ ստացող ընտանքի աշխատունակ անդամների` աշխատանքի անցնելու դեպքում 6 ամիս շարունակել ստանալ նպաստը:

Հարցը ներկայացրեց Աշխատանքի եւ սոցիալական հարցերի նախարար Զարուհի Բաթոյանը՝ նշելով, որ այս փոփոխությամբ նպաստառու ընտանիքի աշխատունակ անդամի հետ, որն ունի գործազուրկի կարգավիճակ, զբաղվածության պետական գործակալության հետ համատեղ  աշխատանք պետք է տարվի: «Սակայն եթե անձը կհրաժարվի իրեն արված երկու հարմար աշխատանքների առաջարկից, տեղի կունենա անապահովության միավորի կտրուկ նվազում՝ հանգեցնելով նաեւ նպաստի իրավունքի կորստի: Այս փոփոխությունն առաջարկում ենք ուժի մեջ մտցնել 2020 թվականի ապրիլի 1-ից: Այն կվերաբերի համակարգ մուտք գործելու համար նոր դիմող կամ նոր փաստագրվող քաղաքացիներին»,-ասաց նախարարը:

Բացի այդ, առաջարկվում է սահմանափակել սոցիալական որեւէ խումբ չունեցող քաղաքացիների նպաստի համակարգում ընդգրկվելու հնարավորությունը՝ աջակցությունն ուղղելով ավելի շատ կարիքավոր խմբերին. «Նաեւ առաջարկում ենք ընտանիքի անապահոգության գնահատման գնութագրիչներն ավելացնել եւս մեկով՝ վարկային պարտավորությունների գծով 100 հազար եւ ավելի դրամ միջին ամսական մարում կատարելու հանգամանքը»,-ասաց Բաթոյանը:

Վարչապետը հայտարարեց, որ այսօր կան նվաստ ստացողներ, որոնք ամսական 1 մլն դրամի վարկ են փակում. «Այսինքն պետությունից ակնկալում են ամսական 30 հազար դրամի նպաստ, հետո ամիսը 700 հազար դրամի վարկ են փակում: Օրինակ, «Բրաբուս» է առել, վարկ է փակում»,-ասաց նա:

Աղբյուր` Փաստինֆո