Փաստ ինֆո

Դեկտեմբերի 2-ին զորամասի մարտական դիրքում սպանված պարտադիր ժամկետային Արթուր Աջամյանի հարազատները բողոքի ակցիա են իրականացնում Կառավարության շենքի մոտ։ Մասնակիցներին մոտեցան ոստիկանության ծառայողները, ինչը լարվածություն առաջացրեց։ Բացի այդ՝ ոստիկանները կենդանի պատնեշ կանգնեցրին կառավարության շենքի և սպանված զինծառայողի հարազատների միջև։ Հարազատները պնդեցին, որ իրենք չեն պատրաստվում որևէ ոստիկանի հետ խոսել։ Զինվորի հորեղբայրը հայտարարեց, որ Կառավարության մոտ կսպասեն այնքան, մինչև նիստն ավարտվի։ 

Աջամյանի մայրը հայտարարեց, որ արդարություն է պահանջում։

«Մեծ մարդիկ են։ Իմ տեգրը կգա կասի՞՝ մամա, ոչ մեկը չի ասի։ Խնդրում եմ արդարություն՝ վաշտի հրամանատարին եմ ուզում, գնդապետին եմ ուզում»,- ասաց Աջամյանի մայրը՝ հավելելով. «Եթե իմ երեխեն խմող լիներ, ծխող լիներ, իմ երեխան վատ ճանապարհով գնար, ես կասեի՝ իմ երեխան է այդպիսին՝ ես իմ երեխայի բնավորությունը գիտեմ։ Բայց իմ երեխան անմեղ երեխա է։ Ինքն իր կամքով գնացել ասել է՝ մամ գնում եմ ծառայեմ»։

Նրա խոսքով՝ որդու զինվորական ծառայության 11 ամիսների ընթացքում որդին չի բողոքել և ասել է, որ լավ է։

Նրա խոսքով՝ Անդրանիկ Քոչարյանը չի կատարել խոստումը։ Նա նշեց, որ Անդրանիկ Քոչարյանը փափուկ բարձ դրեց և ասաց՝ տիկին ջան գնա հուղարկավորի որդուդ և ամեն ինչ կլինի օրենքի սահմաններում, մինչդեռ Աջամյանի մայրը գտնում է, որ ոչ մի օրենք էլ չկա։

«Դրանից բացի՝ թող մի օր զանգի և ծնողին հարցնի, թե ծնողի վիշտն ինչից է գալիս։ Ես ինձ հենց հիմա պաժառ կտամ ինձ։ Բոլորի վրայով կքայլեմ ու կգնամ։ Ինձ ոչինչ պետք չի»։

Բացի այդ՝ Աջամյանի մայրը վստահեցնում է, որ իրեն չեն տեղեկացրել, որ որդին սպանվել է։
«Մի բան լինում է միանգամից հայտարարում են լուրերով, գոնե ինձ զանգեին ասեին՝ բալա ջան,. Որդիդ զոհվել է»,- ասաց Աջամյանի մայրը։

Հիշեցնենք, որ զինվորն սպանվել է 2019թ. դեկտեմբերի 2-ին՝ վաղ առավոտյան։ Պաշտոնական հաղորագրության համաձայն, ժամը 06:50-ի սահմանում, ՊԲ հյուսիս-արևելյան ուղղությամբ տեղակայված զորամասերից մեկի պահպանության տեղամասում, մահացու հրազենային վիրավորում է ստացել ՊԲ զինծառայող, 1998թ. ծնված Արթուր Իշխանի Աջամյանը, իսկ զինծառայող, 1999թ. ծնված Դավիթ Հարությունի Մելիքբեկյանը վիրավորվել է: Քննչական կոմիտեն դեպքի առթիվ քրեական գործ է հարուցել սպանության հատկանիշներով՝ ՀՀ քրեական օրենսգրքի 34-104-րդ հոդվածի 2-րդ մասի 1-ին կետով /երկու կամ ավելի անձանց սպանության փորձ/։ Այսինքն՝ նպատակը եղել է երկու անձի սպանությունը։ Վիրավոր զինվորի կյանքի համար բժիշկները պայքարում են։

Մամուլում շրջանառության մեջ էր դրվել` զինվորի կողմից ծառայակցին սպանելու փորձ կատարելու, ապա ինքնասպանություն գործելու վարկածը, ինչը վրդովմունք էր առաջացրել մահացած զինծառայողի ծնողների, հարազատների մոտ, որոնք բողոքի ակցիա էին իրականացրել Աժ-ի մոտ` պահանջելով պարզել իրենց որդուն սպանողին. Նրանք հավատացած են, որ սպայական անձնակազմը շատ լավ գիտի, թե ինչ է տեղի ունեցել իրականում:

Աղբյուր` Փաստինֆո