Փաստ ինֆո

«Զեյթունի կահույքի ֆաբրիկա»-ի տնօրենին ձերբակալելու մասին որոշումը բողոքարկվել է։ «Փաստինֆո»-ի տեղեկությունները հաստատեց «Զեյթունի կահույքի ֆաբրիկա»-ի տնօրենի փաստաբանը։

Հիշեցնենք, որ նրան ձերբակալելու որոշման մասին ՀՀ քննչական կոմիտեն հայտարարել է դեկտեմբերի 20-ին։ Ըստ պաշտոնական հաղորդագրության՝ քննությամբ տվյալներ են ձեռք բերվել 2012-2018թթ. ընթացքում «Հայաստանի ֆուտբոլի ֆեդերացիա» ԻԱՄ-ի հետ համագործակցության ընթացքում կնքված կապալի պայմանագրերի շրջանակներում Սիսիան, Սևան, Վանաձոր, Արմավիր, Վաղարշապատ, Գյումրի և Ներքին Կարմիր Աղբյուր համայնքների վարչական տարածքներում ֆուտբոլի մարզադաշտերի ու մարզադպրոցների կառուցման և վերանորոգման աշխատանքներն իրականացրած կապալառու՝ Ռուբեն Հայրապետյանին փաստացի պատկանող «Զեյթունի կահույքի ֆաբրիկա» ԲԲԸ տնօրենի և «Հայաստանի ֆուտբոլի ֆեդերացիա» ԻԱՄ-ի կողմից այդ աշխատանքների նկատմամբ տեխնիկական հսկողություն իրականացրած աշխատակցի կողմից խարդախության եղանակով առանձնապես խոշոր չափերով հափշտակություն կատարելու վերաբերյալ:

Նախաքննական մարմինը նշել էր, թե քրեական գործով ձեռք են բերվել ապացույցներ «Զեյթունի կահույքի Ֆաբրիկա» ԲԲԸ տնօրենին և ՀՖՖ տեխ. հսկիչին կասկածելու ՀՀ քրեական օրենսգրքի 178-րդ հոդվածի 3-րդ մասի 1-ին կետով և 325-րդ հոդվածի 2-րդ մասով նախատեսված հանցավոր արարքներ կատարման մեջ եւ որոշումներ են կայացվել նրանց ձերբակալելու վերաբերյալ, որոնց կատարումը հանձնարարվել է ՀՀ ոստիկանության ԿՀԴՊ ԳՎ աշխատակիցներին։

Անցած 6 օրերի ընթացքում ոստիկանությունը չի կատարել քննիչի որոշումը։ «Փաստինֆո»-ի տեղեկություններով՝ ձերբակալելու որոշումը բողոքարկել է ոչ միայն «Զեյթունի կահույքի ֆաբրիկա»-ի տնօրենի փաստաբանը, այլ նաեւ ՀՖՖ տեխնիկական հսկիչի պաշտպանական կողմը։

Հեղինակ՝ Իզաբել Սահակյան

Աղբյուր` Փաստինֆո