Փաստ ինֆո

Երևանի ընդհանուր իրավասության դատարանում քննվող «Սասնա Ծռեր-1» գործով դատական նիստին ամբաստանյալ Պավել Մանուկյանը հայտարարեց, որ, երբ արդեն իրենք գրավել էին ՊՊԾ գունդը, ոստիկանները բռնի ուժով ներխուժել են իր տուն՝ կոտրելով տան դուռը։ Նրա խոսքով՝ պարզ չի, թե ինչ են տարվել, բայց ազգային հերոս Պետրոս Ղևոնդյանի նկարը ճմրթված էր և գետնին ընկած։ Ամբաստանյալ Մանուկյանը հայտնեց, որ այդ ժամանակ, իր բնորոշմամբ, շինծու գործով մեղադրյալ էր նաև իր եղբայրը, ով գտնվում էր «Նուբարաշեն» ՔԿՀ-ում.

«Զանգահարում է ինձ լացակումած և խնդրում է, որ ոստիկաններից մեկին բաց թողնեմ։ Հարցնում եմ՝ գիտե՞ս, թե որտեղ եմ. ու բանից պարզվում է, որ բոլորն էլ գիտեին։ Ճնշումների ներքո, ձայնագրությունները կան, նա պատասխանում է՝ ինձ այլ ելք չի մնում, ինձ կխեղդեն, կկախեն... »։ Մանուկյանի խոսքով՝ այդ զանգից քիչ հետո զանգահարել է նաև Արթուր Վանեցյանը՝ նույն պահանջով։ Մանուկյանը նշեց, որ ոստիկանին բաց են թողել այն պատճառով, որովհետև վերջինս նշանված էր։ Պավել Մանուկյանը վստահեցնում է՝ հարկ եղած դեպքում կրկին կապստամբի.«Ես Ձեզ վստահեցնում եմ, որ վաղը ոչ թե հայր և որդի կապստամբենք, այլ՝ հայր, որդի և թոռներ։ Ամեն ինչի ես պատրաստ եմ։ Նիկոլը չէ՝ Նիկոլի յոթը պապն էլ գան։ Եթե պետական տեռորը կգործի իմ ժողովրդի հանդեպ, ես գերեզմանում էլ լինեմ՝ կապստամբեմ»։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։

Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։

ՊՊԾ գունդը զավթելու եւ նշված այլ արարքները կատարելու մեջ ընդհանուր առմամբ մեղադրվում է 32 անձ: Ի սկզբանե գործը մեկ վարույթով էր ուղարկվել դատարան, որը մակագրվել էր Էրեբունի-Նուբարաշեն վարչական շրջանների դատարանի դատավոր Արտուշ Գաբրիելյանին, սակայն նիստերի անցկացումը, երբեմն, դառնում էր անհնարին եւ գործը բաժանվեց երեք մասի։ «Սասնա Ծռեր» գործից տասը հոգու՝ Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի և Էդվարդ Գրիգորյանի վերաբերյալ առանձին վարույթում անջատված գործը մակագրվել է հիշյալ դատարան գործուղված դատավոր Մեսրոպ Մակյանին՝ ստանալով «Սասնա ծռեր-1» պայմանական անվանումը։

Դատաքննության ընթացքում՝ 2018 թվականի հոկտեմբերին, խմբի անդամ, ազատմարտիկ Արայիկ Խանդոյանը, ով հայտնի է որպես «Միայնակ Գայլ» մահացել է։ «Սասնա Ծռեր-2» գործը՝ 11 ամբաստանյալի վերաբերյալ, ընդունվել է դատավոր Արթուր Օհանյանի վարույթ: Իսկ երրորդ գործով դատավորը՝ ընդհանուր առմամբ 11 ամբաստանյալի մասով, մնացել է Արտուշ Գաբրիելյանի վարույթում։ Նշենք, որ սպանության համար մեղադրանք է առաջադրվել խմբի անդամներ, սույն գործով ամբաստանյալ Արմեն Բիլյանին, Սմբատ Բարսեղյանին։

Հեղինակ՝ Իզաբել Սահակյան

Աղբյուր` Փաստինֆո