Փաստ ինֆո

Ինձ համար ցավալի փաստ է, որ Հայաստանում դաշտն այս վիճակում է։ Այստեղ երկու կոմպոնենտ կա, մեկը կապված է լրատվամիջոցների հետ, մյուս կոմպոնենտը կապված է նորաստեղծ կոռուպցիայի կանխարգելման հանձնաժողովի հետ։ Լրագրողների հետ զրույցում այս մասին ասաց Երևանի քաղաքապետ Հայկ Մարությանը՝ անդրադառնալով իր նկատմամբ հարուցված կարգապահական վարույթին։

«Երբ օրաթերթի կողմից հրապարակվեց տեղեկությունը, մեր կողմից դա բոլոր փաստաթղթերով հերքվեց։ Այնուամենայնիվ այդ հանձնաժողովը վարույթ է հարուցել։ Ես մի փոքր զրուցել եմ իրավաբան ընկերներիս հետ և հարցրեցի՝ չկա՞ գաղափար մինչև վարույթ հարուցելը, ասացին, իհարկե կան։ Վարույթը հարուցելուց հետո են դիմել։

Կարծում եմ՝ այդքան ժամանակ, այդքան գումար, այդքան պետական ռեսուրս ծախսել մի բանի վրա, որն ակնհայտ է, ընդամենը 3000 դրամ կարող էին վճարել և պետռեգիստրով տեսնել, որ ես մինչև իմ քաղաքապետ դառնալն այլևս այդ ընկերության տնօրեն չեմ հանդիսացել։ Եթե այդ 3000 դրամը չկա, ես պատրաստ եմ իմ աշխատավարձից, ես 400 հազ դրամ աշխատավարձ եմ ստանում, ավել գումար չեմ ստանում, ես իմ 400 հազ դրամից պատրաստ եմ 3000 դրամը տրամադրել այդ կառույցին, որպեսզի իրենք նայեն, տեսնեն և պետության ժամանակն ու ռեսուրսները դրա վրա չծախսեն»,-ասաց քաղաքապետը։

Վերջինս նկատեց՝ ուզում էր դա անել, սակայն վախեցավ, որ դա էլ որպես կաշառք կդիտարկեն և մի վարույթ էլ դրա համար կհարուցեն։ Հայկ Մարությանի մոտ տպավորություն է՝ երկրի բոլոր կոռուպցիոներներին բռնել են, բոլորը նստած են և հիմա զբաղվում են նմանատիպ հարցերով։

Հարցին՝ միտում տեսնու՞մ է այստեղ, քաղաքապետն արձագանքեց. «Ճիշտն ասած դա որպես միտում չձևակերպեմ, բայց եթե չեմ սխալվում այդ կառույցի ղեկավարին ներկայացրել է «Լուսավոր Հայաստան» կուսակցությունը։ Չեմ ուզում այդտեղ միտում տեսնել, այնուամենայնիվ կուզենայի այս փաստն արձանագրել»,-հավելեց քաղաքապետը։

 Հեղինակ՝ Հասմիկ Կոշկարյան

Աղբյուր` Փաստինֆո