Փաստ ինֆո

«Ձերբակալությունները երեկ չեն սկսվել, ամեն օր մի բան լինում է։ Հերթական ամոթալի արարքն է այս իշխանությունների կողմից՝ բացարձակ անօրինական եղանակով, մարդուն ուղղակի փողոցից վերցնել եւ տանել, առանց ծանուցելու, առանց որեւէ բանի։ Ակնհայտ է, որ իրենց սարքած, հերթական արհեստական, շինծու գործն է, այդ Վարուժանն էր… Մերուժանն էր՝ բնույթով»,- լրագրողների հետ ճեպազրույցում ասել է ՀՀ երկրորդ նախագահ Ռոբերտ Քոչարյանի ազատության հանձնախմբի համակարգող Աղվան Վարդանյանը՝ անդրադառնալով «5-րդ ալիք» հեռուստաընկերության սեփականատեր Արմեն Թավադյանի ձերբակալությանը:

Աղվան Վարդանյանի խոսքով, Արմեն Թավադյանը Ռոբերտ Քոչարյանի ամենամտերիմ ընկերներից է եւ դա կարող է պատճառ լինել նրան ձերբակալելու համար:

 «Կան մարդիկ, որոնք հսկայական գործ ունեն արած, բայց այդ մասին չեն խոսում, Հայաստանում շատ քիչ մարդիկ գիտեն, թե ինչ դերակատարություն է ունեցել պարոն Թավադյանը մեր անվտանգությունն ապահովելու, Հայաստանին տարբեր աջակցություններ է ցուցաբերել։ Եվ այսօր այս շինծու, ամոթալի վարքագծով ոչ մի տեղ չեն հասնելու։ Լավ, եւս մի ձերբակալություն, եւս տասը ձերբակալություն, բայց հազարների հո չե՞ն ձերբակալելու»,-ասաց Աղվան Վարդանյանը՝ շեշտելով, որ իշխանությունը գնում է մի ճանապարհով, որը բացարձակ հեռանկար չունի եւ հակառակը՝ օր օրի թուլացնելու է իրենց հիմքերը։

Աղվան Վարդանյանը համաձայնեց դիտարկմանը, թե այս ձերբակալությունն ուղղված է լրատվամիջոցի դեմ, նա հիշեցրեց Վարդգես Գասպարի հետ տեղի ունեցած միջադեպը.«Էլի աբսուրդ մեղադրանքով  փորձեցին կալանավորել, ի վերջո, գործ հարուցեցին պարոն Թավադյանի դեմ։ Նա 5-րդ ալիք հեռուստաընկերության՝ ամենադիտվող հեռուստաընկերության սեփականատերն է եւ, բնականաբար, սա փորձ էր՝ ճնշելու լրատվամիջոցներին։ Մենք ցավոք, այս առումով վերադառնում ենք 90-ականներ: Մենք գիտենք՝ դա ինչով է վերջացել, սա էլ է այդպես վերջանալու»։

Հիշեցնենք, որ «Մարտի 1»-ի գործով տուժողներին կաշառք առաջարկելու մեջ կասկածվող Վարուժան Մկրտչյանին մեղադրանք է առաջադրվել ՀՀ քրեական օրենսգրքի 340-րդ հոդվածի 4-րդ մասի 1-ին կետով և ազատ արձակվել  արգելանքից,  նույն քրեական գործի շրջանակներում նույն հոդվածով նախատեսված արարք կատարելու կասկածանքով  երեկ ձերբակալվել էր 5-րդ ալիք ՀԸ սեփականատեր Արմեն Թավադյանը: 

Աղբյուր` Փաստինֆո