Փաստ ինֆո

Երեւանի քաղաքապետարանը խոշոր գործարարի կողմից հերթական նվիրատվությունն է ստանում, որը կրկին կապված է շինթույլտվության հետ:

Այս մասին «Փաստինֆո»-ի հետ զրույցում ասաց Երեւանի ավագանու «Լույս» խմբակցության նախագահ Դավիթ Խաժակյանը՝ նկատի ունենալով «Ջերմուկ գրուպ»-ի կողմից քաղաքապետարանին նվիրաբերված ձնամաքրման մեքենաները:

«Ջերմուկ գրուպ»-ը իրականացնում է կառուցապատում եւ այդ կառուցապատման շինթույլտվությունը դեռեւս տրված էր զրոյականինը, այսինքն, հողային աշխատանքների համար եւ նախապայմանը, իմ տեղեկություններով, այն էր, որ երբ նվիրատվությունը կհասնի, կտան հետագա շինթույլտվությունները»,- «Փաստինֆո»-ին ասաց Դավիթ Խաժակյանը:

Նշենք, որ ըստ մամուլի տեղեկությունների, ՀՀԿ նախկին պատգամավոր Աշոտ Արսենյանը ձնամաքրման 10 մեքենա է նվիրել քաղաքապետարանին, մինչդեռ քաղաքապետ Հայկ Մարությանը այսօր հերքել է տեղեկությունը, այնպես ինչպես հերքում էր հայտնի Կամազների պատմության ժամանակ, երբ օլիգարխ, ՀՀԿ-ական նախկին պատգամավոր Սամվել Ալեքսանյանի հետ փոխկապակցված ընկերությունն էր նվիրատվություն արել քաղաքապետարանին:

«Այս պահին, ես ճիշտն ասած ,չգիտեմ ինքը կապ ունի, թե ոչ։ Այն առումով, որ կա ՍՊԸ, եթե չեմ սխալվում «Ջերմուկ գրուպ» ՍՊԸ-ն է, որը նվիրատվություն է արել այս պահին երկու մեքենա։ Իրենց հետ եռակողմ նվիրատվության մասին պայմանագիր ունենք հինգ մեքենայի մասով, բայց այս պահին երկու մեքենան են մեզ նվեր տվել, ուստի մենք այսօր, քանի որ ընդունում-հանձնումը նոր է տեղի ունեցել, այսօր կհրապարակենք այդ երկու մեքենան, որ նվեր ենք ստացել»,-հայտարարել է Մարությանը:

«Այսինքն, եթե քաղաքապետը, որը զբաղեցնում է քաղաքական պաշտոն, չի կարող իդենտիֆիկացնել հանրապետության խոշոր գործարարներին իրենց կազմակերպությունների հետ, հետո հարց հնչեց քաղաքապետին կոմունալ վարչության պետի հետ կապված, , թե արդյոք իր քրոջ որդին մասնակցել է տենդերին, որի ղեկավարը եղել է վարչության պետը, քաղաքապետը կրկին ասաց՝ ես չգիտեմ , չեմ հետեւել, նշանակում է, որ մենք գործ ունենք հանցավոր անգործության հետ, եթե քաղաքապետին հավատանք»,-մեկնաբանելով Մարությանի հայտարարությունը, նշեց ավագանու անդամը:

Դավիթ Խաժակյանը, սակայն, համոզված է՝ քաղաքապետը իրականում ինֆորմացված է եւ իմիտացիա է ստեղծում, թե իր համար այդ փոխկապակցվածությունները նշանակություն չունեն: Ըստ Խաժակյանի, այս դեպքում եւս գործել է շինթույլտվություն՝ գույքի դիմաց գործարքը:

Ուշագրավ զուգադիպությամբ «Ջերմուկ գրուպ» ՓԲԸ-ի հիմնադիր նախագահ Աշոտ Արսենյանի որդու` Վահագն Արսենյանի նկատմամբ քրեական հետապնդումը դադարեցվել է, վերջինիս առնչվող քրեական գործը` կարճվել: Այս մասին «Հետք»-ի գրավոր հարցմանն ի պատասխան հայտնել են Քննչական կոմիտեի զինվորական քննչական գլխավոր վարչությունից: Գործարարի որդուն մեղադրանք էր առաջադրվել զինվորական ծառայությունից առերևույթ ապօրինի հիմքով ազատվելու համար:

Այս հանգամանքը եւս, ավագանու անդամը պատահական չի համարում: «Բազմաթիվ նման դեպքեր մենք հանդիպել ենք եւ ասում ենք՝ գործեք թափանցիկ, ասացեք, թե ումից ինչ եք ստացել եւ ինչ պատճառով եք դադարեցնում այս կամ այն հետապնդումը, որովհետեւ , երբ դա չի իրականացվում թափանցիկ, հանրության մեջ կա հետեւյալ ընկալումը, որ լավ է, երբ օլիգարխները գույք են վերադարձնում, բայց ո՞րն է երաշխիքը, որ դա համաչափ է եղել եւ առհասարակ, դա ինչպես է տեղավորվում իրավական կոնտեքստում, որ հարուցում ես քրեական գործ, հետո ստանում ես ինչ-որ գույք եւ գործի հարուցումը դադարեցնել»:
Ավագանու անդամն ասում է՝ այս կապը կարող են հերքել, բայց, փաստորեն, արդեն որերորդ անգամ նույն սխեման է գործում, ինչը արդարացի հարցեր է առաջացնում:
Խաժակյանին նաեւ հետաքրքրում է՝ կա՞ն մեր երկրում գործարարներ, որոնք քաղաքապետարանի հետ առնչություն չեն ունեցել, բայց որեւէ նվիրատվություն են իրականացրել: «Ես դեռեւս այդ ցանկի մեջ այդպիսի նվեր չեմ տեսել, կարող է ինչ-որ մեկը մի նստարան է նվիրել եւ դրա դիմաց ոչինչ չի ստացել, բայց, կներեք, միլիոնավոր դոլարների հասնող նվերները տալ եւ ասել, որ դրանք շինթույլտվությունների հետ կապ չունեն, որոնք կրկին մեծ կառուցապատումներին են վերաբերում , դա հասարակությանը մոլորեցնել է»,-համոզված է ավագանու անդամը:

Հարցին, որն է պատճառը, որ հակակոռուպցիոն հանձնաժողովն անտեսում է այս նվիրատվությունների փաստերը եւ որեւէ վարույթ չի հարուցում, փոխարենը Երեւանի քաղաքապետի դեմ սեփական նախաձեռնությամբ վարույթ է հարուցում անհամատեղելիության պահանջների առերևույթ խախտման հիմքով, Խաժակյանը պատասխանեց.« Մամուլում եղել է հրապարակում, կոռուպցիայի կանխարգելման հանձնաժողովը, իրենց ասելով, պետք է հպանցիկ նայեր, առանց վարույթի ասեր՝ չկա նման խնդիր, հերքեր լրատվամիջոցի ասածը եւ վարույթ չհարուցեր: Եթե սա է իրենց տրամաբանությունը, կարող եմ ասել, որ էդպես վարվում էին մեր իրավապահները, օրինակ` քաղաքապետի լիազորությունները անցնելու եւ չարաշահելու հետ կապված»:

Հիշեցնենք, ըստ մամուլի հրապարակումների, Հայկ Մարությանը շուրջ մեկ տարի օրենք է խախտել վերնագրով, որտեղ պնդել է, թե Մարությանը եւ իր պաշտոնավարմանը զուգահեռ նաև զբաղեցրել է «Երկուս ու կես» ՍՊԸ-ի տնօրենի պաշտոնը:
Ավագանու անդամն ասաց՝ ինքը բազմիցս ահազանգել է, կեղծված փաստաթղթեր է ցույց տվել, բայց որեւէ վարույթ չկա:

Ըստ Խաժակյանի, Մարությանն անգամ հարուցված վարույթից է դժգոհում ու տպավորություն է, թե քաղաքային ու կենտրոնական իշխանությունները ցանկանում են, որ հնարավոր բոլոր մարմինները որեւէ կերպ կասկածի տակ չդնեն իրենց գործողություները: «Իրենք ուզում են համարվել անսխալական եւ սրտնեղում են, երբ որեւէ մեկը իրենց գործողությունները դնում է կասկածի տակ ու դրանով կաշկանդում են այդ մարմիններին»,-նշեց Խաժակյանը:

Ավագանու անդամը համոզված է ,այնպես ինչպես ՊԵԿ նախագահ Գագիկ Խաչատրյանի ընտանիքին պատկանող կազմակերպության դեպքում, որը կառուցապատում է իրականացնում համայնքային հողի վրա եւ որը եւս քաղաքապետարանի նվիրատուների ցանկում էր, այս դեպքում էլ իրականում ոչ թե նվիրատվության, այլ գործարքի մասին է խոսքը, ինչի լիազորությունը քաղաքապետարանը չունի:

«Եթե մեր իրավապահ մարմինները համակողմանի չքննեն եւ դա չբացահայտեն, ինչը հիմա տեղի է ունենում, նշանակում է, որ ենք այդ օրինաչափությունը կարող ենք տեսնել, որը սակայն, փաստականորեն չի հիմնավորվի»:

Ըստ Խաժակյանի, գործող իշխանությունը պետք է հետեւություններ անի Հայաստանի ներքաղաքական պատմությունից: «Հաջորդ իշխանությունը, որը կգա, կարծում եմ՝ վեր է հանելու այս գործերը, դիմելու է այդ կառուցապատողներին եւ ասի՝ ի՞նչ պայմաններում են իրականացվել այդ գործարքները»,-եզրափակեց Դավիթ Խաժակյանը:

Աղբյուր` Փաստինֆո