Փաստ ինֆո

Ազգային ժողովի նախագահ Արարատ Միրզոյանը դատի է տվել «Քաղաքացիական գիտակցություն» ՀԿ-ի նախագահ Նարեկ Սամսոնյանին։ Այս մասին «Փաստինֆո»-ն տեղեկացավ «Դատալեքս» դատական-տեղեկատվական համակարգից։

Արարատ Միրզոյանը Նարեկ Սամսոնյանից պահանջում է վիրավորանքի և զրպարտության միջոցով պատվին, արժանապատվությանը և գործարար համբավին պատճառված վնասի հատուցում, ինչպես նաև նախապես վճարված պետական տուրքի և փաստաբանի վարձատրության գումարների բռնագանձում։

Հիշեցնենք, որ նոյեմբերի 24-ին Նարեկ Սամսոնյանը ֆեյսբուքյան իր էջում գրել էր, որ Արարատ Միրզոյանն իր ծննդյան օրվա առթիվ մերձավորների հետ խաշ ուտելու է գնացել և 290 հազ դրամ հաշիվ փակել։ Գրառման մեջ Նարեկ Սամսոնյանն Արարատ Միրզոյանին անվանել էր «պլանքյաշ»։ Արարատ Միրզոյանն էլ պատասխան գրառման մեջ նշել էր, որ վիրավորանքի և զրպարտության համար հայց է ներկայացնելու։

Նարեկ Սամսոնյանն էլ ֆեյսբուքյան գրառման միջոցով շնորհակալություն էր հայտնել Արարատ Միրզոյանին. «Շնորհակալություն ՀՀ-ում ազդեցությամբ 2-րդ պաշտոնյային ուրախ տոնական տրամադրություն հաղորդելու համար: Հայաստանի Հանրապետության ազդեցությամբ երկրորդ պաշտոնյան դատարանում պետք է ապացուցի, որ ՊԼԱՆՔԱՇ չի!!! Սրանից ավելի ուրախ բան չէր կարող լինել:
Հ.Գ. Ի դեպ ես որևէ ծանուցում չեմ ստացել որևէ մարմնից ու էս նվերի մասին իմանում եմ մամուլից»,-գրել է Նարեկ Սամսոնյանը։

Աղբյուր` Փաստինֆո