Փաստ ինֆո

«Այս հիմնախնդիրն իրենց պրակտիկորեն ոչ մի անգամ չի հետաքրքրել, իրենք զբաղվել են միայն մարդու իրավունքներով, սոցիալական խնդիրներով և մտքներով չի անցել անգամ, որ մի պահ կարող է լինեն իշխանության մեջ և այդ պատասխանատվությունն իրենց վրա մնա»,- «Պոլիտէկոնոմիա» հետազոտական ինստիտուտի տարեվերջյան ամփոփիչ քննարկմանը նման կարծիք հայտնեց քաղաքագետ Երվանդ Բոզոյանը՝ անդրադառնալով ԼՂ հիմնախնդրի կարգավորման խնդրին ու գործող իշխանությունների կարողություններին:

«Նոր Հայաստանի» իշխանություններն ընդհանրապես ոչ մի պատկերացում չունեն, թե ինչպես պետք է լուծել ԼՂ հիմնախնդիրը, ինչ ստրատեգիա որդեգրել բանակցային պրոցեսում»,- շեշտեց Երվանդ Բոզոյանը: Ըստ քաղաքագետի, հիմա իշխանության եկած մարդկանց

համար իրենց թիվ մեկ խնդիրն է դարձել Արցախը վերադարձնել բանակցային սեղան եւ դարձնել բանակցային հիմնական կողմ, որպեսզի պատասխանատվությունից  խուսափեն:

Բոզոյանը սա ողբերգություն է համարում: «Որպեսզի մենք կարողանանք Ղարաբաղի հարցում հաջողության հասնել, մենք պետք է դառնանք ուժեղ, հզոր երկիր»,-ասաց Բոզոյանը:

Ըստ քաղաքագետի, Հայաստանին առնվազն  20-30  տարով հարկավոր է սառեցնել խնդիրը  և այդ ընթացքում դառնալ այնքան հզոր, որ Հայաստանի և Ադրբեջանի միջև լինի այնպիսիս անհամաչափություն, ինչպիսին  Պաղեստինի և Իսրայելի միջև է

Բոզոյանն անդրադարձավ բանակցային գործընթացի տարբեր փուլերին ու տարբեր ժամանակահատվածներում եղած տարբերակներին, հիշեցրեց, որ ՀՀ 1-ին նախագահը 1997-ին համաձայնեց այսպես կոչված բանակցային գործընթացի փուլային տարբերակին: «Հայկական կողմը պետք է հանձներ 5 շրջան, այնտեղ պետք է տեղակայվեին խաղաղապահ ուժերը եւ Ղարաբաղի հետ կապված բանակցությունները շարունակվեին, դա կնշանակեր, որ Ղարաբաղի ճակատագիրը կախված է լինելու ՌԴ եւ Ադրբեջանի առեւտրային հետագա հարաբերություններից, իսկ մենք դիտորդի դերում պետք է լինեինք»,-ասաց Բոզոյանը:

Ապա, ըստ Բոզոյանի, առաջ քաշվեց՝ զարգանալ՝ չզիջելով թեզը, որը հաղթեց Տեր-Պետրոսյանի թեզին իշխանափոխության ճանապարհով:

Երվանդ Բոզոյանի խոսքով՝ Մադրիդյան սկզբունքները թույլ են տալիս ժամանակ շահել և հաջողության հասնել: Ըստ նրա, մենք այդ շանսը պետք է գնահատենք եւ նոր ռամավարություն կառուցենք:

«Մադրիդյան սկզբունքները տալիս են շանս սառեցնելու այս խնդիրը: Սառեցնելը շահավետ է մեզ, որովհետև մենք, ըստ էության, ոչ մի զիջման չենք գնում, շանս ենք ստանում ժամանակ շահել և որպես պետություն հզորանալ այնքան, որ մենք կարողանանք պարիտետը փոխել Ադրբեջանի հետ»,- ընդգծեց Բոզոյանը:

Նա շեշտեց՝ Հայաստանը, կորցնելով  Ղարաբաղը, կկորցնի նաեւ Զանգեզուրը եւ արդյունքում կունենանք կիսապետություն:

Աղբյուր` Փաստինֆո