Փաստ ինֆո

«Ինձ հայտնի չէ մի դեպք, որը քննվել է, դատ է եղել եւ գոնե մեկ դրամ բերվել է բյուջե»,-«Պոլիտէկոնոմիա» հետազոտական կենտրոնի կազմակերպած քննարկմանը , անդրադառնալով կոռուպցիայի դեմ պայքարին, հայտարարեց ՀՀ նախկին վարչապետ, տնտեսագետ Հրանտ Բագրատյանը:

Հրանտ Բագրատյանը փնտրել, բայց բյուջեի եկամուտներ-ծախսեր բաժնում որեւէ թիվ չի գտել, որը կվկայեր կոռուպցիայի դեմ պայքարի արդյունքում վերադարձված միջոցների մասին:

«Այդպիսի մի թիվ չեմ տեսել: Ինչքան էլ դժվար լինի, էն որ ասում են՝ բռնում են, այդ ամենը դատավարական գործունեության արդյունքում պետք է արվի: Վստահ եմ, որ այս իշխանության հեռանալուց հետո նրանք ովքեր փող են տվել, դիմելու են դատարան եւ հետ ստանան ամեն ինչ»,- պետությունն ստիպված բախվելու է այդ պրոբլեմին:

Կոռուպցիայի դեմ պայքարի արդյունքը, նրա խոսքով հարկեր-ՀՆԱ հարաբերակցության փոփոխութունն էր՝ 0.8 տոկոսի չափով, որից հետո այլեւս ոչինչ չկա:

Ըստ Բագրատյանի, կոռուպցիան նախ եւ առաջ կառուցվածքային հարց է: Բագրատյանը նշեց ոլորտներ, որտեղ պետք է պայքարել կոռուպցիայի դեմ: «Ամբողջ հանքաքարը արդյունահանվում է դեպի օֆշոր մի գնով, այնտեղից այլ գնով վաճառվում է: Այս իշխանությունը 2 տարի է իշխանության է՝ փոխեք»,-կոչ արեց Բագրատյանը:

Նախկին վարչապետը տնտեսության աշխուժացմանն ուղղված քայլեր հուշեց իշխանություններին՝ նշելով, որ չեն կարող անընդհատ խրախուսել սպառումը:

«Էս կառավարության հետ էդ թեմայով խոսել ընդհանրապես չի ստացվում, ասում է՝ դու դեստաբիլիզացնում ես վիճակը, է գերեզմանում էլ ստաբիլ վիճակ է, դուք դարձնում եք Հայաստանը տնտեսական գերեզման, եթե այդպիսի փոփոխություններ չեք անում»,-նկատեց Բագրատյանը:

Աղբյուր` Փաստինֆո