Փաստ ինֆո

Սևազգեստ մայրերն ակցիա են իրականացնում Եռաբլուր պանթեոնում։ Նրանք «Փաստինֆո»-ի հետ զրույցում ասացին, որ այս կերպ կառավարությանը ուզում են հիշեցնել, որ իրենց տղաները կան, իրենց կյանքը դրել են հանուն հայրենիքի, հանուն գաղափարների, պետության անկախության ու կայացման։

«Կառավարությունից ասում են սպասեք 2 ամիս, 3 ամիս, մոտ 10 օր առաջ էլ հանդիպեցինք Սուրեն Ղամբարյանի հետ, ասաց մեկ շաբաթ ժամանակ տվեք, փորձեմ վարչապետի հետ ճշտել։ Մեկ շաբաթ հետո հարցրեցի պարոն Ղամբարյան՝ ի՞նչ պատասխանեց վարչապետը, նա էլ ասաց պատասխան չունի։ Հարցրի մտե՞լ եք վարչապետի մոտ, ի՞նչ է ասել, նա էլ ասաց, որ ավելի լավ է չպաասխանի։ Սա նշանակում է, որ Կառավարությունն արհամարհել է զոհվածի ընտանիքին, ասել է, թե կարճ ժամանակահատվածում խնդիր կլուծվի»,-ասաց «Մեզ բացակա չդնեք» ՀԿ նախագահ Սաթիկ Խալաթյանը։

Նա նշեց՝ հույս չունեն, որ իրենց խնդիրը լուծվելու է, սակայն իրենց ակցիաները շարունակական բնույթ են կրելու։

«Ուզում եմ մեր տղաներն իմանան, որ իրենց կյանքը որ դրեցին, որպեսզի իրենց ընտանիքներն ապրեն, այդ պատերազմն իզուր արեցին, պատերազմում իրենց հաղթանակներից միայն իրենց ընտանիքները տուժեցին։ Իրենք իրենց կյանքը ներդրեցին, մարտնչեցին, կռվեցին, ազատագրեցին հողերը, բայց այսօր իրենց ընտանիքներն ապրում են աղքատի կարգավիճակում»,-ասաց Խալաթյանը։

Նրա խոսքով, Կառավարության գումարները նախարարների համար են, Կառավարության աշխատակիցների համար են, դատախազների համար են, բայց ոչ ազատամարտիկի ընտանիքների։

Մանրամասները՝ շուտով տեսանյութում։

Հեղինակ՝ Սոնա Գեւորգյան

Աղբյուր` Փաստինֆո