Փաստ ինֆո

Տեղի ունեցող գործընթացը Թավադյանին՝ որպես ԶԼՄ-ի սեփականատեր և ինչ-որ իմաստով քաղաքական գործունեությամբ զբաղվող մարդ, լռեցնելու համար է։ Այս մասին այսօր լրագրողների հետ ճեպազրույցում ասաց Արմեն Թավադյանի փաստաբան Հովհաննես Խուդոյանը։

Ավելի վաղ «Փաստինֆո»-ն հայտնել էր, որ «Մարտի 1»-ի գործով տուժողներին կաշառք առաջարկելու մեջ կասկածվող Վարուժան Մկրտչյանին մեղադրանք է առաջադրվել ՀՀ քրեական օրենսգրքի 340-րդ հոդվածի 4-րդ մասի 1-ին կետով և քրեական գործի շրջանակներում նույն հոդվածով նախատեսված հանցավոր արարք կատարելու կասկածանքով ձերբակալվել է Արմեն Թավադյանը:

«Թավադյանին բերման են ենթարկել Մաշտոցի պողոտայից այսօր 14։20-ին և մինչ այդ հարցաքննության որևէ հրաման չի եղել։ Նրան միանգամից տվել են կասկածյալի դատավարական կարգավիճակ և պարոն Թավադյանը ձերբակալվել է»,-ասաց փաստաբանը։

Նա նշեց, որ հիմքերը մինչ հիմա պարզ չեն, քանի որ ձերբակալման արձանագրության մեջ այլ անձանց գործողություններ են նշված, և Թավադյանի կողմից որևէ գործողության կատարման մասին խոսք չկա։

«Այդ անձանց գործողությունները վերագրվել են պարոն Թավադյանին, այսինքն` որևէ տրամաբանական բացատրություն չկա, թե իր որ գործողությունն է ՀՔԾ-ն ապօրինի համարում»,-ասաց Խուդոյանը։

Նա նաև տեղեկացրեց, որ Թավադյանն այս գործի նկատմամբ որևէ վերաբերմունք չի դրսևորել, ցուցմունք չի տվել և հրաժարվել է առնչություն ունենալ ՀՔԾ-ի հետ, քանի որ գտնում է՝ այս գործով իրեն քրեական հետապնդման ենթարկելու որևէ հիմք չկա։

Մանրամասները՝ տեսանյութում։

Աղբյուր` Փաստինֆո