Փաստ ինֆո

Մասնակի բավարարվել է նաև իմ բողոքը, քանի որ բողոքումս բարձրացրած պահանջներից մեկը հենց դա էր։ «Փաստինֆո»-ի հետ զրույցում այս մասին ասաց ԱԺ նախկին նախագահ Արա Բաբլոյանի պաշտպան Արամ Վարդևանյանը՝ անդրադառնալով Արա Բաբլոյանի գործը նախաքննական փուլ ուղարկելու վերաբերյալ։

«Բողոքումս բարձրացրածը հենց դա էր՝ չհաստատել մեղադրական եզրակացությունը, կարճել քրեական գործը կամ վերադարձնել լրացուցիչ քննության, որի արդյունքում կբացահայտեն՝ գործը պետք է կարճվի»,-ասաց Արամ Վարդևանյանը՝ ընդգծելով, որ իր բողոքը մասնակի է բավարարվել և գործը կարճելու հետ կապված հարցերին դատախազության կողմից հստակ արձանագրվել է, որ այդ պահանջին հնարավոր կլինի անդրադառնալ լրացուցիչ քննության շրջանակներում։

Արամ Վարդևանյանը կարևորեց դատախազության այս որոշումը, որով մասնակի բավարարվեց իր բողոքը։

Քիչ առաջ հայտնի դարձավ, որ Ազգային ժողովի նախկին նախագահ Արա Բաբլոյանի գործը վերադարձվել է քննիչին։  «Փաստինֆո»-ի հետ զրույցում  Գլխավոր դատախազի խորհրդական Գոռ Աբրահամյանն ասել է. «Որոշում է կայացվել մեղադրական եզրակացությունը չհաստատելու և քրեական գործը լրացուցիչ քննություն կատարելու համար վերադարձնելու վերաբերյալ»,-նշեց Գոռ Աբրահամյանը։

ՀՔԾ-ն քրեական գործով նախաքննության ավարտի մասին հայտարարել էր դեկտեմբերի 13-ին։

Հիշեցնենք, որ հոկտեմբերի 28-ին ՀՔԾ-ում հարուցված քրեական գործի շրջանակներում մեղադրանք է առաջադրվել ԱԺ նախկին նախագահ Արա Բաբլոյանին՝ Սահմանադրական դատարանի լիազորություններին տիրանալու համար՝ ՀՀ քրեական օրենսգրքի 300-րդ հոդվածի 1-ին մասով և 314-րդ հոդվածի 1-ին մասով, իսկ ՀՀ ԱԺ աշխատակազմի ղեկավարի նախկին տեղակալ Արսեն Բաբայանին՝ ՀՀ քրեական օրենսգրքի 38-300-րդ հոդվածի 1-ին մասով և 314-րդ հոդվածի 1-ին մասով։

Հեղինակ՝ Հասմիկ Կոշկարյան

Աղբյուր` Փաստինֆո