Փաստ ինֆո

ԼՂ բանակցային գործընացում ունենք շատ կարևոր, մեզ համար ձեռնտու օրակարգի կորուստ։ Այդ օրակարգը կորսված է ՀՀ իշխանությունների ջանքերով։ Այս մասին այսօր «Ոսկանապատ» վերլուծական կենտրոնի համաժողովին ասաց ԱԱԾ նախկին տնօրեն Դավիթ Շահնազարյանը։

«Արդյունքում այսօր ունենք մի իրավիճակ, երբ այսպես կոչված Լեռնային Ղարաբաղի ադրբեջանական համայնքն, ըստ էության, լեգիտիմություն է ստանում։ Այդ մասին ակնարկում են ԵԱՀԿ Մինսկի խմբի համանախագահող երկրների տարբեր պաշտոնյաներ։ Սա չափազանց վտանգավոր հարց է։ Նետված է մի բանաձև, որ ցանկացած կարգավորում պետք է ընդունելի լինի Հայաստանի, Արցախի և Ադրբեջանի համար, ինչն ամբողջությամբ հակասում է ինքնորոշման իրավունքին։ Եվ, ցավոք սրտի, այսօրվա իշխանություններն անընդհատ շարունակում են դա պնդել, չնայած բազմիցս ներկայացված վտանգներին», - ասաց Շահնազարյանը։

Դավիթ Շահնազարյանի խոսքով, Հայաստանի իշխանությունները չեն խոսում այն մասին, որ պատերազմն սկսել ու շարունակել է Ադրբեջանը, չեն խոսում Ադրբեջանի կողմից եկող ռազմական գործողությունների վտանգի մասին։ Նա նաև նշեց, որ ներկայումս Ադրբեջանը միջազգային հանրության կողմից ընկալվում է որպես զոհ, այս երկիրը ստացել է փաստարկների զինանոց, որոնցով միջազգային հանրության առաջ կարող է արդարացնել հերթական ռազմական հարձակումը։

«Առաջին անգամ է, որ միջազգային հանրությունն ու Ադրբեջանը մի դիրքում են, Հայաստանը՝ մեկ այլ։ Բանակցային սեղանին դրված է, այսպես կոչված, փուլային տարբերակ։ Սա ոչ միայն Ադրբեջանն է ասել, ասվել է նաև ԱՄՆ-ի, Ռուսաստանի կողմից։ Ի՞նչ է սա նշանակում. սա նշանակում է, որ կարգավիճակի հարցը դրվում է մի կողմ կամ ուղղակի տարածքներ են հանձնվում»,-ասաց Շահնազարյանը։
Մանրամասները՝ տեսանյութում։

Մանրամասները՝ տեսանյութում

Հեղինակ՝ Սոնա Գեւորգյան

Աղբյուր` Փաստինֆո