Փաստ ինֆո

Երբ կա ահազանգ, վերլուծություն, ինչ-ինչ հարցերի վտանգավորության, մարտահրավերների վերաբերյալ խոսք, եկող պատասխանը ուղղակիորեն կապ չի ունենում առաջադրված հարցի հետ։ Սա շատ հետաքրքիր ձեռագիր է, և ես կարծում եմ՝ մեր հանրությունն այս ձեռագիրը շուտվանից պետք է ապակոդավորեր։ Այս մասին այսօր «Ոսկանապատ» կենտրոնի կազմակերպած քննարկման ժամանակ ասաց վերլուծաբան Կարեն Բեքարյանը։

Նա նշեց, որ այս ամենը վտանգավոր է, երբ իրականացվում է արտաքին քաղաքական դաշտի գրեթե բոլոր ուղղություններում. «Մարդկանց ներկայացնում ես ինչ խնդիրներ կան ռազմավարական մեր դաշնակցի հետ հարաբերություններում՝ դուրս են գալիս ասում հայ-ռուսական հարաբերություններն երբևէ չեն եղել այն մակարդակին, ինչպիսին են այսօր։ Այսինքն բարձրաձայնված խնդիրներին ոչ մի անդրադարձ, այլ ուղղակի օդով նետված ինչ-որ խոսք, որի նպատակը հանրության լայն շրջանակի մոտ տպավորություն թողնելն է, թե մենք որևէ խնդիր չունենք»։

Խոսելով հող հանձնելու վերաբերյալ խոսակցությունների մասին, Բեքարյանն ասաց. «Ասում են`վարչապետը հող է հանձնում, բայց նման բան չկա: Ո՞նց մարդկանց բացատրես, որ հող հանձնելը անջատիչը չի: Դու կարող ես բանակցային գործընթացը տանել այն ուղղությամբ, որ հետագայում, տասնամյակների ընթացքում այն մեր շահերի դաշտ բերելը շատ բարդ կլինի»:

Վերլուծաբանը նշեց՝ մինչև հիմա ձեռք բերված արդյունքները հերթով տապալվում են և իշխանությունները բանակցային գործընթացում իրավիճակ են ստեղծել, որ հետո տարիները հնարավոր է չհերիքեն, որպեսզի հետ վերադառնանք այն կետին, որը եղել է մինչ իշխանափոխությունը. «Իշխանության է եկել մարդ, նրա հետ թիմ, որոնց արցախյան հիմնախնդիրը, բանակցային գործընթացը, կարգավորման գործընթացը երբևէ չի հետաքրքրել»։

Բեքարյանի խոսքով, 1,5 տարվա ընթացքում Ադրբեջանն իմիջ է ստեղծում, թե համբերատար սպասում է Հայաստանում տեղի ունեցող փոփոխություններին, որ այնքան լավ ու դրական է տրամադրված ու տալիս է ժամանակ` բանակցային գործընթացում արդյունք ստանալու համար. «Տվե՞լ է իրականում այդ ժամանակը. եւ այո, եւ ոչ: Տվել է այնքանով, որ բանակցային գործընթացում համբերության իմիտացիա է ստեղծել և ՀՀ վարչապետը բանակցային պատմությանը սկսել է ծանոթանալ Ադրբեջանի նախագահի հետ:

Պարզվում է՝ Հայաստանում ու Արցախում մարդիկ չկային, ում հետ կարելի էր ծանոթանալ: Միեւնույն ժամանակ, այդ ողջ ընթացքում Ադրբեջանը իրականացրել է աշխատանք՝ շփման գծի երկայնքով, բանակցային օրակարգից իր համար անընդունելի կետերը վերացնելու, արտաքին աշխարհում իր իմիջը բարձրացնելու, այդ թվում՝ բանակցային գործընթացի եւ հակամարտության կարգավորման հարցով»։

Մանրամասները՝ շուտով տեսանյութում։

Հեղինակ՝ Սոնա Գեւորգյան

Աղբյուր` Փաստինֆո