Փաստ ինֆո

Տարածքային կառավարման բնագավառում 2020 թվականի պետբյուջեով արդեն իսկ նախատեսված է շուրջ 10 մլրդ դրամ սուբվենցիոն ծրագրերի համար, այնինչ նախորդ տարիներին բյուջեով նախատեսված չէր։ Այս մասին ամփոփիչ մամուլի ասուլիսի ժամանակ հայտարարեց Տարածքային և ենթակառուցվածքների նախարար Սուրեն Պապիկյանը։

«Մենք սա շատ ենք կարևորում, որովհետև սուբվենցիոն ծրագրերն իրենց էությամբ պետություն-համայնք և արդեն իսկ մեր ջանքերով մասնավոր համագործակցության կարևոր պրոդուկտ է, որովհետև այս ճանապարհով փորձում ենք նախ տարբեր համայնքներում բնակվող մեր հայրենակիցների ունեցած հնարավորությունները, որոնք իրենք պատրաստ են համայնքին ընձեռել, դա օգտագործել համայնք-պետության համագործակցության շրջանակներում ի շահ համայնքի և բնակչի»,-նշեց Սուրեն Պապիկյանը։

Նախարարը հայտնեց, որ 2019 թվականին շուրջ 483 սուբվենցիոն հայտ է հաստատվել, որից 462 ծրագիր արդեն կյանքի է կոչվել կամ 2020 թվականին կավարտվի։ Սուրեն Պապիկյանը մանրամասնեց՝ խոսքը գնում է շուրջ 16.4 մլրդ դրամ ծրագրերի մասին, որից համայնքային ֆինանսավորումը կազմում է 6.8 մլրդ, իսկ պետական ֆինանսավորումը՝ 9.6 մլրդ դրամ. «Այսինքն՝ ՀՀ կառավարությունն իր խոստման համաձայն՝ այն է 10 մլրդ դրամի շրջանակներում տրամադրել է 9.6 մլրդ դրամ պետական ֆինանսավորում, որի արդյունքում պետական համայնքներում ունենք զգալի ձեռքբերումներ»,-ընդգծեց նախարարը։
Այս տարի համայնքային ֆինանսավորմամբ ասֆալտապատման աշխատանքներ կատարվել են շուրջ 112 կմ։ Նախարարը կարևորեց նաև ոռոգման աշխատանքների իրականացումը.

«32 համայնքների 39 բնակավայրերում իրականացվել են ոռոգման համակարգի աշխատանքներ։ Չնայած այն հանգամանքին, որ ՀՀ-ն հռչակվել է ամենագազաֆիկացված երկրներից մեկը, մեկ բան հստակ է, որ մեր համայնքների մի զգալի հատված և, մասնավորապես անտառամերձ համայնքները զուրկ են գազաֆիկացումից։ Չնայած նրան, որ կառավարությունն առավել միտված է այլընտրանքային էներգիայի աղբյուրների վրա շեշտադրումը կատարել, այնուամենայնիվ համայնքների ցանկությունը մեր կողմից անտարբերության չեն մատնվել և այս ճանապարհին շուրջ 16 համայնք սուբվենցիոն ծրագրերով համաֆինանսավորել ենք»,-նշեց նախարարը։

Հեղինակ՝ Սոնա Գեւորգյան

Աղբյուր` Փաստինֆո