Փաստ ինֆո

Եթե անձը չունի կոնկրետ դատավարական կարգավիճակ, եթե նրա նկատմամբ որևէ խափանման միջոց ընտրված չէ, վարույթն իրականացնող մարմինը նաև հնարավորություն չունի՝ սահմանափակելու անձի ելքը կամ մուտքը ՀՀ տարածք։ Այս մասին Հանրային հեռուստաընկերության թղթակցի հետ զրույցում ասաց ՀՀ դատախազության՝ ՀՔԾ մինչդատական վարույթի օրինականության հսկողության վարչության պետ Արսեն Մարտիրոսյանը՝ «Հոկտեմբերի 27»-ի գործով նախկին դատավոր Սամվել Ուզունյանի երկիրը լքելու փաստին։

Արսեն Մարտիրոսյանն ասաց՝ այս պահին քրեական գործով քննության առարկա կդառնա նաև այն հարցը, թե ինչ հանգամանքներում և ինչ պայմաններում է Սամվել Ուզունյանը հնարավորություն ունեցել ՀՀ սահմանները լքել։

Նա նկատեց, որ նախաքննությամբ բավարար տվյալներ են ձեռք բերվել քննվող և՛ քաղաքացիական, և՛ քրեական գործով. «Առաջին դեպքում գումարները ստացել է, որպեսզի դատավորներն ի օգուտ քաղաքացու վճիռներ կայացնեն, իսկ երկրորդ դեպքում՝ խոսքը վերաբերում է առևանգման փաստով հարուցված քրեական գործին, վերցրել է կաշառք, որպեսզի ապահովի ենթադրյալ առևանգում կատարած անձանց քրեական պատասխանատվության ենթարկելու հնարավորությունը։ Այս հանգամանքները հաստատվել են ոչ միայն հաղորդում ներկայացնող անձանց ցուցմունքներով, այլև համապատասխան օպերատիվ-հետախուզական միջոցառումների արդյունքում ձեռք բերված այլ փաստական տվյալներով»,-ասաց Արսեն Մարտիրոսյանը։

Նշենք, որ Սամվել Ուզունյանը հարցաքննության չի կանչվել։ Ավելի վաղ տեղեկացրել ենք, որ Սամվել Ուզունյանը երկիրը լքել է 2019 թվականի լույս դեկտեմբերի 21-ի գիշերը՝Երևան-Մոսկվա թիվ 1869 չվերթով, մինչդեռ ԲԴԽ-ն նրան անձեռմխելիությունից զրկել է, այսինքն՝ համաձայնություն է տվել Սամվել Ազատի Ուզունյանի նկատմամբ քրեական հետապնդում հարուցելու և ազատությունից զրկելու վերաբերյալ դեկտեմբերի 20-ին։ Ճիշտ է՝ այդ մասին մամուլին հայտնի է դարձել դեկտեմբերի 21-ին, սակայն նույն այդ հաղորդագրության համաձայն, գլխավոր դատախազի համապատասխան միջնորդությունը քննարկվել եւ բավարարվել է դեկտեմբերի 20-ին։

Հետեւապես՝ պետական սահմանը հատելիս նա արդեն չի եղել անձեռնմխելի, բայց պարզվում է անգամ հարցաքննության կանչված չի եղել, տեսականորեն նա անգամ տեղյակ չի եղել իր նկատմամբ հարուցված հետապնդման մասին, մինչդեռ դատախազությունը մամուլին հայտնել է, որ նրան մեղսագրվում են կաշառքի ստացում, խարդախություն։ Այն է՝ մի դեպքում 2014 թվականի հոկտեմբերին ներկայացված քաղաքացիական հայցի գործով հայցվորի օգտին դատական ակտ կայացնելու համար միջնորդելու, մեկ այլ դեպքում 2007թ. տեղի ունեցած դեպքի առթիվ հարուցված, ապա վարույթը կարճված քրեական գործով տուժողի օգտին գործողություններ կատարելու՝ ենթադրյալ հանցագործությունը կատարած անձանց քրեական պատասխանատվության ենթարկելուն՝ իր պաշտոնեական դիրքն օգտագործելով նպաստելու համար, նրանցից պահանջել և տարբեր ժամանակահատվածներում ստացել է առանձնապես խոշոր չափերով՝ մի դեպքում 13.000 ԱՄՆ դոլարին, մյուս դեպքում՝ 38.000 ԱՄՆ դոլարին համարժեք ՀՀ դրամի կաշառք:

Աղբյուր` Փաստինֆո