Փաստ ինֆո

2019թ-ը կորցրած հնարավորությունների և նոր սպառնալիքների ձևավորման տարի է։ Այս մասին այսօր «Ոսկանապատ» կենտրոնում տեղի ունեցած քննարկման ժամանակ ասաց ՀՅԴ ԳՄ անդամ Արծվիկ Մինասյանը։

Նա նշեց, որ ոչ միայն առնվազն 7 ուղղություններով հնարավոր չեղավ ուժեղացնել պետությունը, այլև նոր սպառնալիքներ ձևավորվեցին։
«Առաջին 3 ուղղությունները վերաբերում են արտաքին հարաբերություններին, արցախյան բանակցություններին և մեր անվտանգության թիվ մեկ երաշխավոր հայոց բանակին։ Սակայն հասարակական հարաբերություններում նաև շատ կարևոր են հաջորդ չորս ուղղությունները, դրանցից մեկը վերաբերում է հայկական իրականությունում մեր անհանդուրժողականության մթնոլորտի ձևավորմանը։ Ատելության խոսքը, քարոզը, ատելության վարքագիծը, որը բխում է իշխանություն ձևավորած անձանց վարքագծից, ցավոք սրտի, Հայաստանում դարձավ առօրյա, և համացանցում գրեթե ամեն օր 1000-ավոր վիրավորանքն ու հայհոյանքը վկայում են այն մասին, որ իշխանությունն ամեն գնով՝ մանիպուլյացիաների միջոցով, կեղծ տեղեկատվության միջոցով փորձում է կարևոր մնալ»,-ասաց Մինասյանը։

Նրա խոսքով, իշխանությունները շարունակ փորձել ընտրել նոր թիրախներ, հասարակությանն անընդհատ նոր թշնամի է հրամցնում, վերջին հակառակորդն էլ պետական կառավարման ամբողջ համակարգն էր։

ՀՅԴ ԳՄ անդամը նշեց նաև, որ փորձ է արվում հասարակության ողջախոհ հատվածին անկյուն մղել. «Ինչու՞ չենք հանգիստ նստում տեղներս ու լռում, որպեսզի իշխանությունը սխալվի։ Բոլոր այն մարդիկ, ովքեր այս հարցադրումը կատարում են պետք է իմանան, որ եթե ազգային անվտանգության, երկրի անվտանգության հարցում լռելու պատճառով կորցնելու ենք համազգային մեր նպատակներից թեկուզ մեկը, ապա մենք հանցագործ կլինենք, եթե լռենք։ Բոլոր այն մարդիկ, ովքեր մտածում են՝ թողենք իշխանությունը որքան հնարավոր է սխալվի, կործանվի, որպեսզի հասարակության աչքերը բացվեն և հասարակությունն ոտքի կանգնի, դա նմանվում է բերդն ավիրելուն ու զրոյից նոր բերդ կառուցելու մոտեցմանը»։

Նա ընդգծեց, որ իշխանության մենատիրացման հաստատման առարկայական գործողությունների սպառնալիք կա. «Դատարանների նվաճման քաղաքականությունը, որ իշխանությունը վերից վար փորձում էր իրականացնել, բացահայտում է իրականում անձնիշխանության, մենիշխանության ցանկություններն ու ձգտումները։ Դատարանի շրջափակումը, փողոցային արդարադատությունը, ակնհայտ ապօրինի խափանման միջոցների ընտրությունը, մարդուն արհեստական ձևով մեղավոր ճանաչելն ու նրա նկատմամբ բացասական էմոցիա առաջացնելով թշնամի հայտարարելը, անմեղության կանխավարկածը ոտնատակ տալը և մի շարք նման հանգամանքները խոսում են այն մասին, որ ոչ միայն չենք կարող իրավական պետության մասին խոսել, այլև խոսում ենք բռնատիրության մասին։ Խոսում ենք մի հասարակության մասին, որտեղ մատնությունը դարձել է հիմնական վարքագծի կանոն, ուրացումը դարձել է ամենօրյա։ Վերանում են արժեքային համակարգերը, որոնք հայ մարդուն հպարտություն են տալիս»։

Նա շեշտեց՝ իշխանությանը որպես ընդդիմախոս հանդես եկող կուսակցությունները որքան հնարավոր է պիտակավորվում են, ոչնչացվում են քաղաքական կուսակցությունները, իսկ առանց դրանց գաղափարախոսություն չի կարող լինել, առանց գաղափարախոսության էլ ապագա չի կարող լինել։
Մինասյանի խոսքով, առանց արժեքային համակարգի իշխանությունը կամ պետք է գնա մենիշխանության հաստատման և բռնատիրության միջոցով իշխանությունը պահելու, կամ պետականությունը կորցնելու ճանապարհով։

Մանրամասները՝ տեսանյութում

Հեղինակ՝ Սոնա Գեւորգյան

Աղբյուր` Փաստինֆո