Փաստ ինֆո

Այս իշխանությունները կարծես չունեն Արցախի հարցի կարգավորման ո՛չ ռազմավարություն, ո՛չ հայեցակարգ և տարբեր պահերի տարբեր բաներ են ասում։ «Ոսկանապատ» կենտրոնում արտաքին քաղաքական հարցերի քննարկման ժամանակ ասաց ՀՅԴ բյուրոյի անդամ Կիրո Մանոյանը՝ անդրադառնալով ԼՂ հակամարտության հարցին։

Վերջինս նկատեց՝ Բրատիսլավայում ԵԱՀԿ արգործնախարարների ժողովից առաջ վարչապետն ԱԺ-ում հայտարարեց, որ հարցի կարգավորման գծով մեր և Արցախի իշխանությունների մոտեցումների մեջ ոչ մի տարբերություն չկա, այսինքն դրանք 100 տոկոսով նույնն են։ Կիրո Մանոյանի կարծիքով նման բան հայտարարել այնպիսի հանդիպումից առաջ, որտեղ պետք է ենթադրաբար բարձրացվեր, որ կարևոր է Արցախի Հանրապետության ներկայացուցիչների մասնակցությունը բանակցություններին, անհասկանալի է, որովհետև եթե նույն բանն են ասելու, ապա ինչու է անհրաժեշտ նրանց մասնակցությունը։

«Կարծում եմ՝ ինքը դա ասաց այլ նպատակով՝ ընտրությունների մասին ակնարկելով։ Ուզեց ցույց տալ, որ խնդիր չունենք և այլն։ Բացի այդ Բրատիսլավայում արտգործնախարարի ելույթը, որտեղ ինքն ավելի շուտ կարմիր գծեր ցույց տվեց, բայց ոչ թե ռազմավարություն կամ հայեցակարգ։ Այդտեղ կար թույլ, խոցելի և նույնիսկ վնասակար մոտեցում, որ խոսում է՝ Արցախի ժողովուրդը տակավին պետք է արտահայտի իր կամքը, թե ինչպես կուզի ապրել։ Այսինքն` անտեսվում է 91 թվականի հանրաքվեն, 2016 թվականի Սահմանադրության հանրաքվեն, 2017 թվականի Սահմանադրության հանրաքվեն։ Ճիշտ այդ տրամաբանությամբ էլ իշխանությունները կողմնակից չեն և քայլ չեն անում Արցախի անկախության ճանաչման ուղղությամբ»,-նշեց Կիրո Մանոյանը։

Նա ընդգծեց, որ Արցախի Հանրապետության արտաքին քաղաքականության գլխավոր ուղղություններից մեկը հենց անկախության ճանաչումն է, բայց Հայաստանի իշխանությունները նրա կարծիքով համաձայն չեն կամ կողմնակից չեն, որպեսզի Հայաստանն աջակցի միջազգային ճանաչման գործընթացին.

«Ճիշտ չի ասել, որ Հայաստանը չի ճանաչել Արցախի Հանրապետությունը։ Նույքան ճիշտ չի ասել, որ լրիվ ճանաչել է։ Կա մեջտեղն ինչ-որ բան, սկսած նրանից, որ մենք ունենք ԱՀ դիվանագիտական ներկայացուցչություն, կան միջպետական, միջգերատեսչական պայմանագրեր, հարաբերություններ և եթե այդքանով, իսկ մենք կարողանանք մի քանի այլ պետությունների էլ աջակցություն ապահովել, ապա բանակցությունները շատ ավելի լուրջ կլինեն այն իմաստով, որ Ադրբեջանը կհասկանա՝ անվերջ պատանդ չի կարող պահել այս բանակցությունները»,-հավելեց ՀՅԴ բյուրոյի անդամը։

Անդրադառնալով հակամարտության փուլային լուծման տարբերակին՝ Կիրո Մանոյանը նկատեց՝ անկախ նրանից սեղանին դրված է նման տարբերակ, թե ոչ, համանախագահողներն այդ մասին չեն բարձրաձայնել. «Դրանից արդեն 5-6 տարի առաջ որոշ փորձեր եղել են՝ ասելու, որ եկեք սկսենք գրել այն բոլորի մասին, ինչի շուրջ կա նախնական համաձայնություն։ Այդ ժամանակվա Հայաստանի իշխանությունները բարեբախտաբար դեմ եղան և նման բան չսկսվեց։ Մինչև այսօր բանակցությունների տրամաբանությունն, այն է` եղել, որ սա փաթեթային լուծում է, որի գործարկումը կարող է լինել փուլերով, բայց ամբողջ կարգավորումը փաթեթի մեջ երևում է։ Չի կարելի համարել, որ եղել է որևէ համաձայնություն, մինչև բոլոր հարցերի շուրջ համաձայնություն չլինի»,-հավելեց Կիրո Մանոյանը։

Մանրամասները՝ տեսանյութում

Հեղինակ՝ Հասմիկ Կոշկարյան

Աղբյուր` Փաստինֆո