Փաստ ինֆո

Այս մեկ տարվա ընթացքում Հայաստանում քաղաքական օրակարգը մեծամասամբ ձևավորվել է արտախորհրդարանական ու հանրային շրջանակների կողմից։ Իշխանությունները ամեն կերպ փորձում են վիժեցնել արտախորհրդարանական քաղաքական միտքը և չեն գալիս քննարկման հարթակներում կարծիք հայտնելու, քանի որ չեն ուզում մեզ բանի տեղ դնել։ Այս մասին այսօր «Ոսկանապատ» կենտրոնում քննարկման ժամանակ ասաց ՀՀԿ փոխնախագահ Արմեն Աշոտյանը։

«2018թ-ի նախընտրական բանավեճերը ցույց տվեցին, որ իշխանության ոչ մի ներկայացուցիչ ոչ մի թեմայով ունակ չէր համոզիչ լինել ի համեմատ այն ընդդիմադիր ուժերի, որոնք մասնակցում էին այդ բանավեճերին»,-ասաց ՀՀԿ փոխնախագահը։

Նրա խոսքով, իշխանությունները վախենում են արտախորհրդարանական ուժերի հետ բովանդակային քննարկումներից։

Անդրադառնալով հարցին, թե ինչպիսին կարող է լինել 2020թ-ը, Աշոտյանն ասաց. «2020-նն ասում են Չինական հորոսկոպով առնետի տարի է, բայց Հայաստանում առնետի տարին սկսվել է 2018թ-ի ապրիլից։ Մենք արդեն երկու տարի է քաղաքական առումով ապրում ենք առնետի աստղակերպի տակ, որովհետև դավաճանությունն ու ճամբարափոխությունը, ուրացումը դարձել են նոր քաղաքական բրենդ։ Եվ սա ամենավտանգավորն է»։
Աշոտյանն ընդգծեց՝ իշխանությունը քայքայում է արժեհամակարգային «մատրիցան», ներմուծում է ճշտի ու սխալի, բարոյական ու անբարոյականի նոր ալգորիթմ. Որը քայքայում է բոլոր այն սոցիալական կապերը, որ Հայաստանում եղել են։

«Ուզենք թե չուզենք ցանկացած հասարակություն ունի իր կառուցվածքը. անգամ ամենաժողովրդավար հասարակությունն ունի այն։ Հայաստանում իշխանափոխությունը բերել է նրան, որ բոլորս մեր վանդակներից, բջիջներից դուրս ենք եկել, և հիմա իրոք Վանգա է պետք լինել հասկանալու համար՝ 2020թ-ին ինչ է լինելու։ Մենք առավոտյան արթնանում ենք մի օրակարգով, բայց չգիտենք այդ օրն ինչպես է ավարտվելու, չգիտենք՝ ինչպես է մթնելու օրը, ում են բռնելու, ում վրա են քրեական գործ հարուցելու, վարչապետը ինչ համեմատություններ է անելու։ Չգիտենք էլ ինչ նոր սկանդալ է ի հայտ գալու իրենց ծախսերի հետ կապված»,-ասաց ՀՀԿ փոխնախագահը։

Մանրամասները՝ տեսանյութում

Հեղինակ՝ Սոնա Գեւորգյան

Աղբյուր` Փաստինֆո