Փաստ ինֆո

Կրթության ոլորտում բարեփոխումների մասին խոսելիս պետք է անկեղծ լինել միմյանց հետ, ամրագրել խնդիրներն ու մարտահրավերները, ֆիքսել տարիներ շարունակ ձևախեղված կրթության համակարգի արատները։ Այս մասին այսօր ԱԺ-ում «Կրթության ոլորտի բարեփոխումներն առաջիկա ռազմավարական մարտահրավերները» թեմայով լսումների ժամանակ ասաց ԱԺ նախագահ Արարատ Միրզոյանը։

Նա ընդգծեց՝ Հայաստանում այլևս երբեք կրթության համակարգը չպետք է ծառայի կուսակցության, օրվա իշխանությունների շահերին  ու դրա սպասարկմանը, երբեք չպետք է ճնշվի ազատ ինքնամտածողությունն ու պետք է մերժվի կոռուպցիայի ցանկացած դրսևորում։

«Հայաստանի կրթության համակարգում կրթություն տրամադրողները պետք է շարունակականորեն արդիականացնեն իրենց գիտելիքները, մեթոդաբանությունն ու այն համապատասխանեցնեն ժամանակի պահանջներին»,-ասաց ԱԺ նախագահը։

Նա նշեց՝ պատահական չէ, որ կրթության իրենց տեսլականում մեծ տեղ են հատկացրել տեղեկատվական տեխնոլոգիաներին ու բնական գիտությունների զարգացմանը. «Մեր օրերում գիտելիքներն, իհարկե, անհրաժեշտ են, բայց ոչ բավարար։ Գիտելիքներին զուգահեռ հավասարապես կարևոր է զարգացնել սովորողների հմտությունները։ Ժամանակակից կրթությունն այլևս անհնար է պատկերացնել առանց քննադատական մտածողության հմտությունների, ինչի ներդրումը կրթական համակարգում պետք է դառնա մեր առաջնահերթություններից մեկը»։

Նա նշեց, որ ՀՀ քաղաքացի կրթելու գործում նաև մեծ դեր ունեն արժեքները, ապա ավելացրեց, որ ազգային արժեքների հետ մեկտեղ կրթական համակարգը պետք է լինի ազատության, հավասարության, մարդու հիմնարար իրավունքների ջատագովը։

«Ազատությունը, հավասարությունը, ժողովրդավարությունը հանդիսանում են հենց մեր ազգային արժեքների մի մասը։ Ուզում եմ հավաստիացնել, որ այս արժեքներից յուրաքանչյուրի խրախուսումն որևէ կերպ չի հակասում մյուսի խրախուսմանը, և քաղաքական նեղ շահերից ելնելով դրանք միմյանց հետ հակադրության մեջ դնելու փորձերն անիմաստ են»,-ասաց ԱԺ նախագահը։

Հեղինակ՝ Սոնա Գեւորգյան

Աղբյուր` Փաստինֆո