Փաստ ինֆո

«Ինչո՞վ են փաստարկում կամ ապացուցում, որ այդ մարդը ոչ թե Նիկոլ Փաշինյանի աջակիցն է, այլ Ռոբերտ Քոչարյանի աջակիցն է, ինչ-որ փաստաթո՞ւղթ են հայտնաբերել,ինչո՞վ են ստուգել»,-«Փաստինֆո»-ի հետ զրույցում նման կարծիք հայտնեց «Ազգային անվտանգություն» կուսակցության նախագահ Գառնիկ Իսագուլյանը՝ անդրադառնալով նախօրեին ՀՀ ոստիկանության տարածած տեսանյութին։

Հիշեցնենք, որ ոստիկանությունը տեսանյութ է տարածել, որտեղ երկու անձի գաղտնի նկարահանված խոսակցությունը ներկայացվում է իբրև ՀՀ երկրորդ նախագահ Ռոբերտ Քոչարյանի աջակիցներից մեկի կողմից մարտի 1-ի գործով տուժած անձին կաշառելու փորձ, որպեսզի վերջինս հրաժարվի իր կարգավիճակից և ցուցմունքից։

«Ոստիկանությունը ինչ-որ մեկին բռնում է, ասում են՝ Ռոբերտ Քոչարյանի աջակից, ես ուզում եմ իմանալ՝ ինչպես են որոշել, ինչ-որ մեկը կնիքը դրել է վրա՞ն: Ես չգիտեմ, թե մեր ոստիկանությունը ինչի հիման վրա է հայտարարում, թե այդ մարդը նրա աջակիցն է: Ինչ-որ մարդու ճարել են, որը զենք ունի, որը հայտարարում է ինչ-որ բան, բայց իրենք ոնց են համարել, որ նա աջակից է, թե այդ մարդն է հայտարարել, որ ինքն աջակից է»-շարունակում է Գառնիկ Իսագուլյանը:

Նա ասում է, թե ինքը սատարում երկրորդ նախագահին, բայց երբեւէ որեւէ խմբի մաս չի կազմել, մինչդեռ բոլորը մտածում են հակառակի մասին: «Հիմա , եթե ես ինչ-որ հանցանք եմ կատարում, ինչ կապ ունի դա այն փաստի հետ, որ ինձ հայտարարում են Ռոբերտ Քոչարյանի աջակից: Ես ուզում եմ իմանալ՝ Նիկոլ Փաշինյանը այդ անձի համար, ում որ բռնել են, վարչապետ է, թե վարչապետ չէ: Հիմա, ինչո՞ւ չեն ասում, մարդը, որի վարչապետը Նիկոլ Փաշինյանն է, Մարտի 1-ի զոհերի հարազատներին կաշառք է առաջարկել, ինչո՞ւ այդպես չեն ասում»,-նշեց Իսագուլյանը՝ հավելելով, որ այս ամենն իրականում աբսուրդ է ու տգիտություն:

Ըստ Իսագուլյանի՝ գործող իշխանությունն է պետբյուջեից վճարված 30 միլիոն դրամ փոխհատուցման տեսքով «կաշառել» զոհերի հարազատներին: «Այդ դիակները իրենք փողով առան, որ օգտագործեն: Հիմա նրանց ինչ ասեն, այդ էլ պետք է անեն, կապ չունի, նույնիսկ, եթե գտնեն , թե իրականում ով է սպանել, ասելու են, ՝ դուք ասեք, որ Քոչարյանն է »,-հայտարարեց Գառնիկ Իսագուլյանը:

Աղբյուր` Փաստինֆո