Փաստ ինֆո

Երևանի քաղաքապետարանի նախաձեռնությամբ ստեղծված «Ակտիվ քաղաքացի» կայքում քաղաքացիների առաջարկերից 17-ն արժանացել է հավանության, որոնց իրագործումը քաղաքապետարանը նախատեսվում է իրականացնել 2020 թվականին։ Այս մասին «Փաստինֆո»-ի գրավոր հարցմանն ի պատասխան հայտնում են քաղաքապետարանի տեղեկատվության և հասարակայնության հետ կապերի վարչությունից։

Մեր այն հարցին, թե ո՞ր առաջարկներն են հավանության արժանացել և նախատեսված 500 մլն դրամ բյուջեից որքան գումար է տրամադրվելու դրանց իրագործմանը, քաղաքապետարանից հայտնում են, որ առաջարկներից յուրաքանչյուրի բյուջեն չի գերազանցելու 30 մլն դրամը։ Հավանության արժանացած 17 առաջարկների իրագործման համար նախատեսվում է կազմել նախագծանախահաշվային առաջադրանքներ՝ հետագայում բաց մրցույթ հայտարարելու նպատակով. «Եթե տվյալ առաջարկի նախահաշվարկային փաստաթղթերը կազմելու ընթացքում կամ առաջարկների իրագործումից հետո ի հայտ գա որոշակի տնտեսում, որն իր հերթին կբավարարի հաջորդ ամենաշատ հավանումներ ստացած առաջարկի իրագործմանը, ապա տվյալ գումարը կուղղվի հաջորդ առաջարկին»,-հայտնում են քաղաքապետարանից։

Երգող նստարաններից մինչև մանեկեններ՝ անցուղիներին, քաղաքացիների հանրօգուտ գաղափարները բազմաթիվ են։
Հավելենք՝ «Ակտիվ քաղաքացի» հարթակում մասնակիցների կողմից այս պահի դրությամբ ստացվել է 740 առաջարկ, որոնցից կայքի կանոններին համապատասխանել և հրապարակվել է 204-ը, իսկ հավանության արժանացած 17 առաջարկները ներկայացնում ենք ստորև.

1. «Հ․ Օշականի անվ․ N 172 դպրոցի բակային տարածքը դարձնել ապահով և փոխել
պատուհանները»
2. «Վերականգնենք «Կարմիր բլուր»-ը
3. «Մարզական կենտրոն՝ «Հաղթանակ» թաղամասում»
4. «Լեդ լուսավորություն՝ «Հաղթանակ» թաղամասում»
5. «#Իմքայլը հանուն Խարբերդի»
6. «Տաղավարի հարակից տարածքի բարեկարգում և մարզասարքերի
տեղադրում»
7. «Խաղահրապարակի ստեղծում»

8. «Սքեյթ այգի (Skate Park)»
9. «Բարեկարգ Քանաքեռ-Զեյթուն համայնք. այգի»
10. «Սարյան պուրակի բարեկարգում»
11. «Բարեկարգ Քանաքեռ-Զեյթուն համայնք. խաղադաշտ»
12. «Մանեքեններ՝ անցուղիներին»
13. «Հերոսների ծառուղի»
14. «Վիրտուալ իրականության տաղավար՝ Երևան քաղաքի
թանգարանում»
15. «Արևային տաղավար»
16. «Ամենագեղեցիկ դիտահորերը և փողոցի հետիոտնային անցումները՝
Երևանում»
17. «Երգող նստարաններ»

Հեղինակ՝ Հասմիկ Կոշկարյան

Աղբյուր` Փաստինֆո