Փաստ ինֆո

Ոստիկանության տարածած տեսնայութը կասկածելի է։ Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը՝ անդրադառնալով Ոստիկանության` դեկտեմբերի 19-ի երեկոյան տարածած տեսանյութին, իբրև թե, Ռոբերտ Քոչարյանի աջակիցներից մեկը հանդիպել է 2008 թվականի մարտի 1-ի դեպքերից տուժած անձանցից մեկին ու հորդորել հրաժարվել ցուցմունքից` խոստանալով վճարել դրա դիմաց։

Լևոն Քոչարյանի խոսքով՝ կա երկու տարբերակ։ «Մարդը, որը հայտնվել է մի քանի ամիս առաջ՝ որպես աջակից, ինչպես մյուսները եւ այնպես չէ, որ ստուգվում է եւ նրա մոտ հատուկ նպատակով այն մարդուն ուղարկել են և ձայնագրել, այդ ամենը՝ շահարկելու համար։ Երկրորդ տարբերակը, որը վատ տարբերակ է և չեմ ուզում մտածել այդ մասին, որի սկզբանե այդ մարդու հայտնվելն է եղել ինչ-որ հանգամանքներով պայմանավորված»,- ասաց Լևոն Քոչարյանը՝ նշելով, որ ոչինչ պետք չէ բացառել՝ նկատի ունենալով իշխանությունների գործելավոճը։

Լևոն Քոչարյանն ընդգծեց, որ երկու տարի շարունակ պնդել են, որ նպատակ չունեն գործի քննությանը խոչընդոտելու և ոչ էլ ցուցմունք կա, որը ցանկություն են ունեցել փոխելու։ «Միակ անհամաձայնությունը ցուցմունքների հետ, հայրս էլ արդեն ասել է, որ Արշակ Կարապետյանի ինչ-որ մի նախադասության հարց է։ Ուրիշ ցուցմունք տուժողի անհասկանալի է, թե դա ինչ ձևով պետք է փոխի »,- ասաց Լևոն Քոչարյանը։ Քոչարյանի խոսքով՝գործում չկա տուժողի ցուցմունք, որը կարող է վնասել։

Աբսուրդ է, որ նման բան անի մի մարդ, ում ճանաչում ենք երեք ամիս։ Ըստ նրա՝ նախօրեին տարածված հաղորդագրությունը դատարանի որոշման վրա ազդելու նպատակ է ունեցել։

«Քանի անգամ տեսանք, որ, երբ դատարանը գտնվում է խորհրդակցական սենյակում, ինչ որ նման բաներ են տեղի ունենում»,- նշեց Քոչարյանը։

Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո