Փաստ ինֆո

Կրթական համակարգի կուսակցականացվածության ու քաղաքականացվածության խնդիրը, ըստ էության, մեզ հաջողվել է լուծել, և դրա լավագույն ապացույցն այն է, որ անցած երկու համապետական ընտրություններին մենք ունեցել ենք զրո բողոք քաղաքական ներգրավվածության առումով։ Այս մասին այսօր ԱԺ-ում «Կրթության ոլորտի բարեփոխումներն առաջիկա ռազմավարական մարտահրավերները» թեմայով լսումների ժամանակ ասաց ՀՀ կրթության, գիտության, մշակույթի և սպորտի նախարար Արայիկ Հարությունյանը։

Նա նշեց՝ կդժվարանա ասել անցած մեկ ու կես տարիների ընթացքում իր քաղաքական ուժից քանի հոգի է տնօրեն դարձել. «Ես նման ինֆորմացիա չունեմ, կարող է 1-2-ը լինեն 1400 դպրոցից։ Սա կարծում եմ լավագույն ցուցանիշներից մեկն է, որ մեր հանձնառությունը կատարում ենք»։

Խոսելով կոռուպցիայի մասին, Հարությունյանն ասաց ճիշտ չի լինի ասել, թե այդ խնդիրն ամբողջությամբ լուծվել է, սակայն կրթական համակարգում այլևս համակարգային կոռուպցիա չկա։

«Ենթակառուցվածքների առումով հանրակրթության ոլորտում շատ մտահոգիչ իրավիճակ ունենք։ Տիկին Զոհրաբյանը մի քանի օր առաջ նկարներ էր այստեղից ցույց տալիս, ես կարող եմ 100 տարբեր դպրոցներից նման նկարներ ձեզ ցույց տալ, և ոչ միայն հանրակրթական ոլորտից, այլ օրինակ սպորտ դպրոցներից, մշակութային օջախներից և  հաջորդ տարվա միջոցներով մենք զգալի մեծ միջոցներ ենք ներգրավվել այս խնդիրների լուծման համար՞.-ասաց Հարությունյանը։

Նա ընդգծեց, որ սեյսմիկ առումով էլ դպրոցները խնդիրներ ունեն և Տարածքային զարգացման և ենթակառուցվածքների նախարարության հետ համատեղ ծրագիր է իրականացվում։

Նախարարը տեղեկացրեց, որ մինչև 2023թ-ը դասագրքերն ու ծրագրերը կփոխվեն. « Որոշ առարկաների շրջանակներում այդ փոփոխություններ հիմա անում ենք, բայց դրանք համակարգային բնույթ չեն կրում՝ իրավիճակային են։ Բայց համակարգային փոփոխությունների սկիզբը հաջորդ տարվանից է, երբ փորձարկումների մեկնարկը կլինի»։

Հարությունյանի խոսքով, իրենց կառավարությունն ամենաազգային կառավարությունն է, որ երբևէ եղել է ՀՀ-ում և կրթական բարեփոխումներում ազգային բաղադրիչին շատ մեծ նշանակություն է դարձվում։

Մանրամասները՝ տեսանյութում։

Հեղինակ՝ Սոնա Գեւորգյան

Աղբյուր` Փաստինֆո