Փաստ ինֆո

Մեզ հաճախ բողքներ են գալիս, որ պատշաճ չենք կազմակերպում մրցույթներ դպրոցի տնօրենների, ուսուցիչների կամ այլ աշխատակիցների համար։ Լրագրողների հետ հանդիպման ժամանակ այս մասին ասաց Արարատի մարզպետ Գարիկ Սարգսյանը։

Նա ընդգծեց, որ իրենց կողմից ոչ ոք չի հովանավորվում. «Մարզպետարանից «դաբրոներ» ոչ մեկ չի կարող ունենալ, մրցույթները կազմակերպվում են մաքսիմում ազատ, թափանցիկ և եթե նույնիսկ հավակնորդներն իրենց հայտը ներկայացնելիս դպրոցներում կստանան հետևյալ պատասխանը, որ այ էս ինչ մեր մյուս կոլեգայի համար մարզպետարանից դաբրո կա, ասել են, ապա անպայման դիմեք մեզ։ Դրանք հերյուրանքներ են»,-նշեց մարզպետը՝ վստահեցնելով, որ չի կարող լինի դեպք, որ մրցույթի համար դիմած հավակնորդին որևէ մեկը մերժի կամ որևէ պատճառով նրան փորձեն ետ պահել մրցույթին մասնակցելու իր իրավունքից։

Գարիկ Սարգսյանը նկատեց՝ դպրոցներում կան խնդիրներ, որոնք դեռևս նախկինից են ժառանգել. «Այն ժամանակ գործել է մաղարիչների, ծանոթների, կոռուպցիոն այլ մեխանիզմներ, որոնք այսօր բացառված են»,-ասաց մարզպետը՝ հավելելով, որ եթե ինչ-որ դպրոցի տնօրեններ կփորձեն իրենց համար ցանկալի անձանց անցկացնել այդ մրցույթներում և դա կփորձեն կապել մարզպետարանի կամ մարզպետի գործոնը կփորձեն շահարկել, մարզպետը վստահեցրեց՝ կարժանանան խիստ և համարժեք գնահատականի ընդհուպ հեռացում իրենց զբաղեցրած պաշտոնից։

Հեղինակ՝ Հասմիկ Կոշկարյան

Աղբյուր` Փաստինֆո