Փաստ ինֆո

Նիկոլ Փաշինյանը հայտարարել է, որ երեխաների թրաֆիքինգի մասին քննչական կոմիտեի՝ նախօրեին հնչեցված հայտարարությունն իր համար շոկային է եղել։

«Այդ ժամանակ մարդկայնորեն չէի կարող հավատալ, որ այս թեմայով կլինեն կոնկրետ բացահայտումներ, բայց փաստը մնում է փաստ, որ ունենք ձերբակալված անձինք»,- ասաց վարչապետը։ Չխախտելով ՀՀ օրենսդրությամբ սահմանված անմեղության կանխավարկածը՝ վարչապետը նշեց, որ, եթե նման գործողություններ արվել են, նշանակում է, որ կա առնվազն կասկածելու հիմքեր։

ՔԿ նախագահ Հայկ Գրիգորյանը տեղեկացրեց, որ սույն գործով ձերբակալվածների թիվը 5-ն է։ «Ապացույցների համակցությունն այս պահին բավարար է նրանց ՀՀ քրեական օրենսգքրի 167-րդ հոդվածի 2-րդ մասով մեղադրանք առաջադրելու համար, որի դիսպոզիցիան հնչում է հետևյալ կերպ՝ ծնողներից երեխաների ապօրինի բաժանելը»,- ասաց Գրիգորյանը՝ հավելելով, որ գործով կատարվել են մի շարք խուզարկություններ ԱԱԾ-ի և Դատախազության, Ոստիկանության գործընկերների հետ համատեղ։ Գրիգորյանը հայտնեց, որ առգրավվել են ձերբակալված անձանց պաշտոնավարումից ՝ 2012թ.-ից առ այսօր եղած բոլոր փաստաթղթերը, որոնք կենթարկվեն մանրակրկիտ քննության։

«Ունենք մի շարք անձանց ուղղակի ցուցմունքներ, որոնք մերկացնում են այդ անձանց հանցանքը կատարելու մեջ»,- ասաց Գրիգորյանը՝ շեշտելով, որ մոտ օրերս այդ անձանց կառաջադրվեն մեղադրանքներ, կընտրվեն խափանման միջոցներ։ Վարչապետը կարևորեց, որ այդ գործի քննությունը լինի առանց էմոցիաների և ամբողջական։

«Կարևոր է հասկանալ, թե ինչպես է պատահել և ինչպես է պատահում, որ ՀՀ-ում կարող է նման մեխանիզմ գոյություն ունենալ և գործել»,- ասաց Փաշինյանը։ Նրա խոսքով՝ այդ մեխանիզմը տարիներ է գործել և պետք է առաջնային խնդիր դնել գործն ամբողջական՝ իր «մետաստազներով» բացահայտելու համար։

Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո