Փաստ ինֆո

Ժուռնալիստների միության նախագահ Սաթիկ Սեյրանյանի համոզմամբ լրատվականների շուրջ տեղի ունեցող պրոցեսը խրախուսվում է իշխանությունների կողմից։

«Այն, ինչ տեղի է ունենում մամուլի նկատմամբ, մամուլի շուրջ՝ «Yerevan today»-ի դեպքը, «Hayeli.am»-ինը, չեմ կարող ասել ինչով է պայմանավորված, քանի որ բոլոր այդ երեք դեպքերի պարագայում էլ վերջնական պատասխան չունեցանք, թե ինչ հայտնաբերեին»,-այս մասին այսօր լրագրողների հետ ճեպազրույցում ասաց Սեյրանյանը։

Հիշեցնենք, որ այսօր առավոտյան «Ժողովուրդ» օրաթերթի խմբագրության աշխատակիցները խմբագրությունը հայտնաբերել են տակնուվրա արված։ Թանկարժեք իրերը՝ համակարգիչները, տեսախցիկները տեղում են մնացել, փոխարենը փաստաթղթերն են քարուքանդ են արվել։ Խմբագրությունը տեղի ունեցածը գնահատել է որպես ճնշման միջոց՝ թերթի նկատմամբ։

Ս.Սեյրանյանը նշեց, որ տեղի ունեցածը դիտարկում է մամուլի շուրջ իրականացվող գործողությունների, կոչերի արդյունք. «Սա դիտարկում եմ այն ամենի շուրջ, ինչ ասվում է մամուլի աշխատողների հասցեին՝ մերոնքական, ձերոնքական, ֆեյք, իրական, այս բոլոր որակավորումներով, բարձրաստիճան պաշտոնյաների կոչերով, վարչապետից սկսած դասեր են տալիս, հաթաթաներ են տալիս մամուլին, որն անդրադառնում է լրագրողի աշխատանքի վրա բոլոր առումներով»։

«Փաստինֆո»-ի հարցին, ինչո՞վ է պայմանավորված, որ հեղափոխությունից հետո նման դեպքեր եղան և դրանցից ոչ մեկը չբացահայտվեց՝ Սեյրանյանն ասաց. «Ես համարում եմ, որ այդ ամենը խրախուսվում է իշխանությունների կողմից։ Միգուցե ինչ-որ մարդիկ փորձում են «լավամարդ» լինել, իրենց նվիրվածությունը դրանով ապացուցել իշխանություններին, սա կոնկրետ «Hayeli.am»-ի դեպքին եմ վերագրում, բայց իշխանությունները՝ Հայաստանում անկախացումից ի վեր՝ և՛ Լևոն Տեր-Պետրոսյանի օրոք, և՛ Ռոբերտ Քոչարյանի, և՛ Սերժ Սարգսյանի, և Նիկոլ Փաշինյանի, բոլորը ցանկանում են վերահսկել մամուլը։ Ամեն մեկն իր ձևով։ Խնդիրն այն է, որ մեր գործընկերը, որը ժամանակին շատ սուր ձևով դատապարտում էր այդ ամենը, կոշտ հայտարարություններ էր անում, հիմա այդ նույնն իր իշխանության ժամանակ է անում»։

Մանրամասները՝ տեսանյութում։

Հեղինակ՝ Սոնա Գեւորգյան

Աղբյուր` Փաստինֆո