Փաստ ինֆո

Մենք 2008 թվականից հետո հայտնվել ենք լրիվ տարբեր դաշտերում, նաև որպես ընկեր և ընդհանուր ընկերը պետք է լինի կա՛մ իմ ընկերը, կա՛մ իր ընկերը։ Լրագրողների հետ զրույցում այս մասին ասաց ԱԺ պաշտպանության և անվտանգության հարցերով մշտական հանձնաժողովի նախագահ Անդրանիկ Քոչարյանը՝ անդրադառնալով ՀՖՖ նախկին նախագահ Ռուբեն Հայրապետյանի հայտարարությանն այն մասին, որ Անդրանիկ Քոչարյանն ընդհանուր ընկերոջ միջոցով զգուշացրել է նրան՝ լքել երկիրը։

Անդրանիկ Քոչարյանը նկատեց՝ Ռուբեն Հայրապետյանի ընկերը Սերժ Սարգսյանը և նրա թիմակիցներն են, իսկ իր ընկերները միշտ եղել են հստակ քաղաքական դաշտում. «Ես 1991 թվականից եղել եմ ուժային կառույցների բարձրաստիճան պաշտոնյա անձ և պարզվեց, որ Ռուբեն Հայրապետյանը շատ է ձգտել ունենալ նման կառույցների ղեկավար կազմի հետ որոշակի հարաբերություններ։ Հարցին՝ արդյոք նա պաշտոնի համար է իր հետ ընկերություն արել, Անդրանիկ Քոչարյանն ասաց. «Իր վերջին պահվածքը դրա մասին է խոսում։ Ես կարող եմ ենթադրություն անել՝ այս անիմաստ խառնակչությունն ինչ նպատակ ուներ։ Իմ ֆեյսբուքյան գրառման մեջ այդ ինչուների պատասխանը պարզ գրված է։ Ռուբեն Հայրապետյանը խոսել է քաղաքական այլ մարդկանց ուրանալու-չուրանալու մասին։ Ես կարծում եմ Ռուբեն Հայրապետյանն այն մարդը չէ, որ կարող է նման հարցերի շուրջ խոսել։

Ինչ վերաբերում է ուրանալ-չուրանալուն, ես Վազգեն Մանուկյանի կառավարության ժամանակ զբաղեցրել եմ Ներքին գործերի նախարարի տեղակալի, հետ առաջին տեղակալի, դրանից հետո շարունակել եմ զբաղեցնել ՊՆ առաջին տեղակալի պաշտոնները, իսկ թե Վազգեն Մանուկյանին ով է ուրացել, թող իրենք մտածեն, որովհետև Վազգեն Մանուկյանի ուրացման պրոցեսը սկսել է հենց ինքը՝ Վազգեն Մանուկյանը։ Նա է առաջինը ինքն իրեն ուրացել, երբ Սերժ Սարգսյանն իրեն վիրավորում էր, ինքը շարունակում էր Սերժ Սարգսյանի հետ համագործակցել։ Անդրանիկ Քոչարյանը չի կարող լինել այդ պրոցեսի մեջ լինել այն քաղաքական համակարգում, որտեղ իրենք ուրանում են իրենց քաղաքական անցյալը»,-նշեց Անդրանիկ Քոչարյանը։

Դիտարկմանը, որ Ռուբեն Հայրապետյանը նշել է՝ Անդրանիկ Քոչարյանը բազմաթիվ մարդկանց հետ հաց է կիսել, պատառներ է կիսել, սակայն այդ ամենը մոռացել է, Անդրանիկ Քոչարյանը նկատեց. «Հաց ձեր հետ էլ ենք կիսել, մյուսների հետ էլ ենք կիսել։ Հաց կիսելը քաղաքական կատեգորիա՞ է։ Իր հետ ոչ միայն կիսել ենք, այլև ընտանիքներով ենք մտերիմ եղել, մեր ընտանիքները միասին են մեծացել մինչև 2008 թվականը։ Այնպես, որ այստեղ քննարկելու թեմա չկա»,-ասաց Անդրանիկ Քոչարյանը՝ բացառելով Ռուբեն Հայրապետյանի հետ որևէ խոսակցություն ունենալու հավանականությունը։ Նա ընդգծեց՝ նախկին ընկերները խոսալու թեմա չեն կարող ունենալ։

«Հայրապետյանը հիմա Սերժ Սարգսյանի մոտ երևի անվտանգության մարմիններում է աշխատում և այնտեղից է սնվում՝ իր դարակազմիկ գաղափարներն ինչպես սփռի հաղորդումների ժամանակ»,-ասաց Անդրանիկ Քոչարյանը։

Դիտարկմանը, որ Ռուբեն Հայրապետյանը հայտարարել է, թե սարսափում է, որ Անդրանիկ Քոչարյանը պետք է քննի Ապրիլյան հանձնաժողովի հետ կապված հարցերը, Անդրանիկ Քոչարյանն ասաց. «Ինքը պետք է սարսափի, որ ես անպայման լսելու եմ իր քաղաքական հոգեհայրիկ Սերժ Սարգսյանին։ Ռուբեն Հայրապետյանի խարդավանքների ամբողջ հիմքում դրված է՝ ինչպես անել, որ արժեզրկեն այն գործընթացը, որ Ապրիլյան քննիչ հանձնաժողովն իրականացնում է և հասնելու է իր նպատակին»։

Մանրամասները՝ տեսանյութում։

Աղբյուր` Փաստինֆո