Փաստ ինֆո

«Ստյոպա Սաֆարյանը Հանրային Խորհրդի նախագահի ամենաանաչառ թեկնածուն չէ»՝ Հայաստանի մարդու իրավունքների առաջին պաշտպան Լարիսա Ալավերդյանի նախօրեին արված հայտարարությունը հաջորդել էր Սաֆարյանի հնարավոր նշանակման մասին տեղեկատվությանը: Իսկ այսօր արդեն կառավարության նիստի ընթացքում վարչապետ Փաշինյանը ներկայացրեց Հանրային խորհրդի երկրորդ նախագահ Ստեփան Սաֆարյանին, որը շնորհակալություն հայտնելով խոստացավ ծառայել ի շահ Հայաստանի և ի շահ Արցախի հանրապետությունների:

Այս ընդհանրական և պրոցեդուրային հայտարարություններից անդին, շատ հետաքրքիր է, թե այնուամենայնիվ, որպես խորհրդատվական մարմնի ղեկավար ի՞նչ խորհուրդներ պիտի տա վարչապետին Ստյոպա Սաֆարյանը: Այն նույն Սաֆարյան Ստյոպան, որը մինչ օրս ուղղակի իմաստով եղել է ի սկզբանե ներկա իշխանության կողմից սևերի ու սպիտակների բաժանած հասարակությունը ավելի բևեռացնելու, առկա ատելության մթնոլորտն ավելի խորացնելու առաջամարտիկը: Իր այդ դերը կատարելիս նա չի խորշել անգամ ամենատգեղ որակումներից, գռեհկաբանություններից և հայհոյանքներից: Ընդ որում, և՛ քաղաքական ուժերի հանդեպ, և լրատվամիջոցների ներկայացուցիչների: ՈՒ այդ ամենն արվել է հրապարակայնորեն, ցուցադրաբար, ի տես իշխանության: Ըստ ամենայնի, նաև իշխանությանը հաճոյանալու համար, քանի որ «ասֆալտին փռելու ու պատերին ծեփելու» մոտիվացիայով վարչապետի յուրաքանչյուր հրապարակային ելույթից հետո Ստեփան Սաֆարյանը բուռն ոգևորության նոպաներ էր ունենում: Ի դեպ, նրա նոպաները ոչ միայն տարածվում էին ընդդիմադիր դաշտի գործիչների, այլև կոնկրետ լրատվամիջոցների և լրագրողների վրա:

Եվ որքան էլ այսօր նա փորձի հանրային խորհրդի նախագահի դիրքից ամպագոռգոռ խոսքեր ասել, ինքը կշարունակի մնալ այն նույն Ստյոպա Սաֆարյանը, որը «Միջազգային եւ անվտանգության հարցերի հայկական ինստիտուտի» ղեկավար որպես արգելել էր մի շարք լրատվամիջոցների մասնակցությունը հոկտեմբերի 27-ի հետ կապված իր կազմակերպած միջոցառմանը: Միջոցառման նախօրեին ՄԱՀՀԻ ղեկավար Ստյոպա Սաֆարյանն իր ֆեյսբուքյան էջում ազդագիր էր տեղադրել լրատվամիջոցների համար, որում, մասնավորապես, նշել էր, թե՝ «News.am», «Hayeli.am», «168.am», «Yerevan Today», «7or.am», «Livenews.am» կայքերի, «5-րդ ալիք» ու «Երկիր մեդիա» հեռուստաընկերությունների համար մուտքը փակ է լինելու:

Ավելին, լրագրողներին էլ, որ վերը նշված միջոցառմանը գնացել էին, վիրավորել էր, խոչընդոտել նրանց աշխատանքը: Ի դեպ, այս փաստով այն ժամանակ լրագրողը դիմել էր հենց Հանրային խորհուրդ՝ խնդրելով, որ գնահատական տրվի ՀԽ անդամ Ստյոպա Սաֆարյանի վարքագծին ու էթիկայի բոլոր կանոնները ոտնահարող պահվածքին, որը կոնկրետ դեպք լինելով՝ միտված է հասարակության մեջ ատելության մթնոլորտը խորացնելուն:

Գնահատական, բնականաբար տրվել էր՝ այն համատեքստում, որ Ս. Սաֆարյանի արարքը ոչ միայն բարոյաէթիկական նորմերի դեմ է, ոչ կոռեկտ և ոչ տղամարդկային այլև անհավասարակշիռ է և խոսքի իրավունքի դեմ:

Հիմա, եթե այս որակական հատկանիշներն ունեցող մարդուց է երկրի վարչապետը խորհրդատվություն ակնկալում, վիճակը, մեղմ ասած, ողբերգական է:
Հավելենք նաև, որ ՍտյոպաՍաֆարյանի քույրը՝ փաստաբան Սեդա Սաֆարյանն էլ լինելով Մարտի մեկի գործով իրավահաջորդների շահերի ներկայացուցիչ, տարիներ շարունակ է զբաղված հասարակությունը բաժանելու, բևեռացնելու գործով և այսօր էլ նույնը շարունակում է դատարանում՝ խորացնելով ատելության մթնոլորտը:

Մի խոսքով, «բաժանիր, որ տիրես» կարգախոսի հանգույն գործելու խորհուրդ, հաստատապես կտա Ստյոպա Սաֆարյանը վարչապետին: Ի դեպ, այս սկզբունքն առանց այդ է; Փաշինյանին խորթ չէ, ուղղակի քույր ու եղբայր Սաֆարյանները հիմա առավել մոտիվացված, շահագրգիռ կերպով կլծվեն իրենց գործին:

Փաստացի, տարիներ շարունակ գրանտային ծրագրերից սնվող և ուղղակիորեն իրեն ֆինանսավորող կազմակերպությունների շահերը սպասարկող Ստյոպա Սաֆարյանը Հանրային խորհրդի նախագահ է նշանակվել՝ փոխարինելով Երրորդ հանրապետության խարսխային գործիչներից մեկին՝ Վազգեն Մանուկյանին:

Հեղինակ՝ Մարինե Մինասյան

Աղբյուր` Փաստինֆո