Փաստ ինֆո

Փաստաբան Էդգար Թումասյանը բարձրաձայնում է ՀՀ Սահմանադրական դատարանի դատավոր Վահե Գրիգորյանի արարքին քրեաիրավական գնահատական տալու հարցը։

Պարզվում է փաստաբանը ՀՀ վերաքննիչ քրեական դատարան էր բողոքարկել իր պաշտպանյալի նկատմամբ հեռախոսային խոսակցությունների վերահսկում (прослушка) օպերատիվ-հետախուզական միջոցառում իրականացնելու թույլտվություն տալու մասին որոշումը, որի արդյունքում ՀՀ վերաննիչ քրեական դատարանը 2019 թվականի նոյեմբերի 5-ին որոշում էր կայացրել կասեցնել գործի վարույթը և դիմել Սահմանադրական դատարան։

Վերաքննիչ քրեական դատարանի դիմումը ՀՀ Սահմանադրական դատարանում մուտքագրվել է 2019 թվականի նոյեմբերի 7-ին և նախնական ուսումնասիրում իրականացնելու և գործը քննության ընդունելու հարցի վերաբերյալ հաղորդում ներկայացնելու համար մակագրվել է Սահմանադրական դատարանի դատավոր Վ.Գրիգորյանին, սակայն վերջինս սահմանված ժամկետում գործը քննության ընդունելու հարցի վերաբերյալ հաղորդում չի ներկայացրել, որի արդյունքում Սահմանադրական դատարանի 26.11.2019 թվականի ՍԴԱՈ-140 աշխատակարգային որոշմամբ հաղորդումը ներկայացնելու ժամկետը երկարացվել է մինչև 2019 թվականի դեկտեմբերի 17-ը, սակայն Վ.Գրիգորյանն այդ ժամկետում ևս չի ներկայացրել գործը քննության ընդունելու հարցի վերաբերյալ հաղորդում, որի հետևանքով 17.12.2019 թվականի ՍԴԱՈ-164 աշխատակարգային որոշմամբ գործի նախնական ուսումնասիրման ժամկետը երկարաձգվել մինչև դեկտեմբերի 20-ը ներառյալ։

«Փաստորեն ստացվում է, որ Վահե Գրիգորյանը, զբաղեցնելով Սահմանադրական դատարանի դատավորի պաշտոնը, հրաժարվում է իրականացնել իր գործառույթային պարտականությունները, որոնք կապված են ՀՀ քաղաքացիների իրավունքների և օրինական շահերի խախտման հետ, սակայն չաշխատելու պայմաններում ստանում է բարձր աշխատավարձ և օգտվում ՀՀ Սահմանադրական դատարանի դատավորի համար նախատեսված այլ առավելություններից»,- նշել է փաստաբանը՝ հարցնելով. «ՀՀ Սահմանադրական դատարանի դատավոր Վահե Գրիգորյանի արարքն ենթակա՞ է որակման ՀՀ քրեական օրենսգրքի 179-րդ հոդվածով, թե ոչ»։

Աղբյուր` Փաստինֆո