Փաստ ինֆո

Ստյոպա Սաֆարյանի Հանրային Խորհրդի նախագահի ամենաանաչառ թեկնածուն չէ:

«Փաստինֆո»-ի հետ զրույցում նման կարծիք հայտնեց Հանրային խորհրդի անդամ, Հայաստանի մարդու իրավունքների առաջին պաշտպան Լարիսա Ալավերդյանը:

Նախ, տիկին Ալավերդյանը ասաց, որ համաձայն չէ իշխանական թեւից հնչեցված այն թեզի հետ, թե ՀԽ նախկին նախագահ Վազգեն Մանուկյանի գործունեությունը Խորհրդում քաղաքական էր:

«Օրենքում որեւէ խոսք չկա , որ ՀԽ նախագահը չի կարող լինել քաղաքական գործիչ, այնտեղ ուղղակի գրած է, որ իր գործունեությունը չպետք է քաղաքականացվի, ինչն ամենաանորոշ ձեւակերպումն է իրավաբանական առումով, որովհետեւ պետք է հստակեցնել, իսկ ո ՞րն է ոչ քաղաքականը: Եթե իշխանական ուժի կողմից է, դա ոչ քաղաքական է, իսկ եթե համաձայն չէ իշխանության քաղաքականությանը, քաղաքակա ՞ն է»,-հարցնում է Լարիսա Ալավերդյանը:

Ըստ նրա, այս ձեւակերպումը ամենախոցելի ձեւակերպումն է եւ տարածական մեկնաբանություն է ենթադրում, որովհետեւ որեւէ գործունեություն կամ լինելու է համաձայնություն իշխանության քաղաքական գծի հետ, կամ անհամաձայնություն՝ ամբողջովին կամ մասնակի ու հիմա, ըստ Ալավերդյանի, ստացվում է, որ եթե երկրորդն է, ապա գործունեությունը քաղաքական է, եթե առաջինն է, քաղաքական չէ:

«Ստյոպա Սաֆարյանը մինչեւ այսօր արտահայտել եւ արտահայտում է ամբողջական համաձայնություն իշխող ուժի քաղաքական գծի հետ: Դա համարվելո՞ւ է քաղաքական , թե՞ ոչ: Այս առումով իր գործունեությունը, այո , քաղաքականացված է եւ արտահայտությունները՝ այդ թվում»,-ասաց Լարիսա Ալավերդյանը՝ շարունակելով. «Հաշվի առնելով այն միջադեպը, որը տեղի ունեցավ լրագրողների հետ, եւ ոչ միայն այդ դեպքը, այլեւ այն բառապաշարը, որը նա օգտագործել է լրագրողների նկատմամբ, ես կարծում եմ, որ նա ամենաանաչառ թեկնածուն չէ»:

Նշենք, որ մամուլի հրապարակումների համաձայն, Հանրային խորհրդի նախագահ է նշանակվելու քաղաքագետ, ՀԽ անդամ Ստյոպա Սաֆարյանը: Ըստ տեղեկությունների, կառավարության վաղվա նիստին ՀՀ վարչապետ Նիկոլ Փաշինյանը կառաջադրի նրա թեկնածությունը: Նման առաջարկ ստանալու մասին տեղեկությունը Ստյոպա Սաֆարյանը factor.am-ին հաստատել է:

Հիշեցնենք, որ ՀԽ նախկին նախագահ Վազգեն Մանուկյանը հրաժարական տվեց Հանրային խորհրդի նախագահի պաշտոնից այն բանից հետո, երբ իշխող ուժի ներկայացուցիչները հայտարարեցին, որ ՀԽ-ի գործունեությունն անիմաստ է, իսկ Վազգեն Մանուկյանի գործունեությունը՝ քաղաքականացված:

«Հանրային խորհրդի վերջին նիստին ես Ձեզ ներկայացրեցի, որ մի քանի անգամ փորձել եմ հանդիպել վարչապետի հետ, գտնել համագործակցության եզրեր՝ թուլացնելու հասարակության մեջ առկա լարվածությունը և Հանրային խորհրդի միջոցով կանխելու որոշ քայլեր, որոնք, իմ կարծիքով, վտանգավոր են պետության համար: Գիտեք նաև, որ այդ փորձերն ապարդյուն են անցել: Մեր վերջին նիստից անցել է որոշակի ժամանակ, և նորից ոչ մի արձագանք: Այս պայմաններում իմ հետագա գործունեությունը Հանրային խորհրդում համարում եմ անիմաստ և դուրս եմ գալիս խորհրդից, ինչի մասին արդեն գրավոր տեղեկացրել եմ կառավարությանը: Կշարունակեմ պայքարը հանուն մեր պետության և ժողովրդի շահերի, ինչպես պայքարել եմ իմ ողջ կյանքի ընթացքում»,-հեռանալիս հայտարարել էր Վազգեն Մանուկյանը:

Աղբյուր` Փաստինֆո