Փաստ ինֆո

Քաղաքական գործիչ, ՀՅԴ նախկին անդամ Աղվան Վարդանյանն այսօր հայտարարել է՝ ՀՀ երկրորդ նախագահ Ռոբերտ Քոչարյանի ազատության հանձնախումբ ստեղծելու մասին։ Նա նշել է, որ Քոչարյանը կալանքի տակ է պահվում հակաօրինական ձևով, ապա թվարկել ստեղծված իրավիճակից դուրս գալու ուղիները։

«Որոշ ժամանակ առաջ հասարակական, քաղաքական, մշակույթի, մարզաշխարհի մոտ 100 գործիչներ հանդես եկան հայտարարությամբ ի պաշտպանություն Ռոբերտ Քոչարյանի։ Նրանք իշխանությանը կոչ էին անում վեր կանգնել անձնական շահերից, ընդունել սեփական նախապաշարումների անճշտությունը՝ մարտի 1-ի գործի առնչությամբ, վերջ տալ դատական համակարգի ճնշումներին։ Նաև հույս էին հայտնում, որ նախագահ Քոչարյանի ազատ արձակումը հասարակական համերաշխության ազդակ կդառնա»,-ասաց Վարդանյանն ու ավելացրեց, որ այս հայտարարությանը հաջորդել է ստորագրահավաքը, սակայն իշխանության դիրքորոշումը չի փոխվել և իշխող ուժը շարունակում է իր անհեռանկար գործելաոճը։

Նախկին դաշնակցականի կարծիքով, հանրային կյանքի լարվածության պատճառներից մեկը մարտի 1-ի գործի շուրջ ընթացող զարգացումներն են և, նրա խոսքով, ՀՀ երկրորդ նախագահին ոչ իրավական ձևով կալանքի տակ պահելը։

«Ակնհայտ է՝ ներկայացված մեղադրանքը որևէ կապ չունի 10 զոհերի մահվան հանգամանքների բացահայտման հետ։ Հայկական երկու պետությունների կայացման հարցում էական ներդրում ունեցող Ռոբերտ Քոչարյանին անազատության մեջ պահելն անպատիվ գործ է, չի բխում մեր պետության շահերից, հակառակը՝ վնասում է պետության վարկը, խարխլում է դատական համակարգը։ Ի վերջո` իշխանության այս սևեռումը չի բերում հանրային համերաշխության և թույլ չի տալիս կենտրոնանալ իրական օրակարգերի ու խնդիրների վերաբերյալ»,-ասաց Վարդանյանը։

Նրա խոսքով, Քոչարյանին բանտախցում պահելը ոչինչ չի տալիս ո՛չ քաղաքացիներին, ո՛չ էլ պետությանը և պետք է դուրս գալ ստեղծված իրավիճակից։
«Ամենապարզ ելքը երկրորդ նախագահի խափանման միջոցը փոխելն է։ Իշխանությունն առայժմ չի անում այդ՝ դատավորներին պարտադրելով հակաօրինական որոշումներ։ Մնում է երկրորդ ճանապարհը՝ խափանման միջոցի փոփոխությունը դարձնել հանրային, քաղաքական պահանջ»,-ասաց Վարդանյանն ու ավելացրեց, որ արձագանքելով 60.000 քաղաքացիների պահանջին ստեղծվել է նախաձեռնող խումբ, որի գործունեության նպատակը Ռ. Քոչարյանի ազատությունն է։

Ըստ նրա՝ Քոչարյանին կալանքի տակ պահելը Հայաստանի ամոթն է և քիչ թե շատ մտածող յուրաքանչյուր քաղաքացի ինքն իրեն պետք է հարցնի՝ ինչի համար է դա արվում և ինչ է տալիս հասարակությանը։

«Մեր խնդիրն է մարդկանց մտածել տալ այս հարցերի մասին, երբ մարդը մտածում է նաև ունենում է դիրքորոշում։ Քոչարյանն իր գործունեության ընթացքում և՛ Արցախում, և՛ Հայաստանում ուղղակիորեն աշխատել է 100-ավեր մարդկանց հետ և այդ մարդիկ գիտեն Քոչարյանի կերպարը, գործն ու ապրելակերպը։ Մեր խնդիրն է այդ մարդկանց մղել դիրքորոշման»,-ասաց Աղվան Վարդանյանը։

Հեղինակ՝ Սոնա Գեւորգյան

Աղբյուր` Փաստինֆո