Փաստ ինֆո

Ազգային ժողովի Պետաիրավական հարցերի մշտական հանձնաժողովը ՀՀ Գլխավոր դատախազ Արթուր Դավթյանի հրաժարականի պահանջի հարցով նիստ չի գումարել և նիստ չգումարելու կամ հետաձգելու պատճառների մասին չի տեղեկացրել։ Փոխարենն ակցիայի մասնակիցները հանդիպել են ԱԺ «Իմ քայլը» խմբակցության պատգամավոր Թագուհի Թովմասյանի հետ։ Այս մասին «Փաստինֆո»-ի հետ զրույցում ասաց «Իրավունքի ուժ» իրավապաշտպան հասարակական կազմակերպության համահիմնադիր Արման Ղարիբյանը

Ավելի վաղ հայտնել էինք, որ Դավթյանի հրաժարականը պահանջող ակցիայի մասնակիցներից Արման Ղարիբյանն ու Մարինա Պողոսյանն հանդիպել էին ԱԺ «Իմ քայլը» խմբակցության ղեկավար Լիլիթ Մակունցի և «Իմ քայլը» խմբակցության պատգամավորներ Սիսակ Գաբրիելյանի ու Արեն Մկրտչյանի հետ։ Մակունցը հանձնարարել էր, որ պետաիրավական հանձնաժողովը բարձրաձայնված խնդրի վերաբերյալ մեկշաբաթյա ժամկետում նիստ գումարի և նրանց հրավիրի այդ նիստին, որպեսզի իրենց ունեցած տեղեկությունները փոխանցեն հանձնաժողովին։

Ղարիբյանը հայտնեց՝ միայն այսօր ԱԺ-ում իմացել են, որ Պետաիրավական հարցերի մշտական հանձնաժողովի նախագահ Վլադիմիր Վարդանյանը դարձյալ երկրում չէ և կարծում են՝ գուցե դա է պատճառը, որ հանձնաժողովի նիստը չի գումարվել։

«Մեզ խոստացված ժամկետները չեն պահպանվել և գոնե չեն էլ իրազեկել ինչու չեն պահպանվում կամ առհասարակ այդ նիստը լինելու է թե ոչ, որովհետև տարին մոտենում է ավարտին հնարավոր է մարդիկ արձակուրդ գնան և նիստը տեղի չունենա։ Չունենք ոչ մի տեղեկություն, բացարձակ լռություն է իրենց կողմից»,-ասաց «Իրավունքի ուժ» ՀԿ-ի համամիմնադիրը։

Խոսելով Թովմասյանի հետ հանդիպման մասին` Ղարիբյանն ասաց, որ հանդիպումը բավականին դրական, գործընկերային մթնոլորտում է անցել, ապա ավելացրեց՝ Թովմասյանն իմքայլական այն եզակի պատգամավորներից է, որին կարիք չկար բացատրելու ինչու են պահանջում Գլխավոր դատախազի հրաժարականը, քանի որ պատգամավորը շատ լավ իրազեկված է։

«Ի տարբերություն մյուսների` Թովմասյանը չակերտավոր հիշողության կորուստ չունի և լավ է հիշում, թե ով-ով է եղել և ով-ով է այսօր։ Քննարկման արդյունք դեռևս չունենք, պետք է սպասենք, քանի որ նա պատգամավորներից մեկն է և խմբակցությունը բավականին շատ պատգամավորներ ունի ու պետք է հասկանանք ընդհանուր խմբակցության դիրքորոշումն ինչպիսին է»,-ասաց նա։

Հեղինակ Սոնա Գեւորգյան

Աղբյուր` Փաստինֆո