Փաստ ինֆո

«Մեկ Հայաստան» կուսակցությունը որոշել է մշակել «Արցախի Հանրապետությունը ճանաչելու մասին» ՀՀ օրենքի նախագիծը, որը պետք է դրվի շրջանառության մեջ։ Այս մասին այսօր հրավիրված ամփոփիչ ասուլիսում ասաց «Մեկ Հայաստան» կուսակցության ղեկավար Արթուր Ղազինյանը։

«Դա պատասխանն է Ադրբեջանի կողմից Բրատիսլավայում կայացած հանդիպումից առաջ հրապարակված հուշագրի, ապա նաև Ադրբեջանի արտաքին գործերի նախարարի՝ հարցազրույցում հնչեցրած մտքերի։ Խոսքը Արցախը ճանաչելու գործընթացի մասին է, որը կարող է տևել 10 օր, 10 տարի, այսինքն` սկսել գործընթաց դեռ չի նշանակում այն ավարտել կոնկրետ ժամկետներում։ Խոսքն այստեղ Արցախի ճանաչման օրակարգը մշտապես ՀՀ քաղաքական օրակարգում պահելու մասին է»,- ասաց Ղազինյանը։

Նա ընդգծեց, որ այս գործընթացի շնորհիվ սահմանվում է այն կարմիր գիծը, որից այն կողմ որևէ իշխանություն Արցախի հարցում իրավունք չունի անցնել։
«Ադրբեջանի կողմից ցանկացած քայլ՝ ուղղված Արցախի տարածքային ամբողջականության և անվտանգության դեմ, անմիջապես կհանգեցնի սույն օրենքի ընդունման գործընթացի ակտիվացման»,-ասաց Ղազինյանը։

Նա նշեց, որ ՀՀ-ի և ԱՀ-ի դիրքորոշումներն ու պատկերացումները երբևէ չեն համընկել և չեն կարող համընկնել. «Նույնիսկ Ռոբերտ Քոչարյանի և Սերժ Սարգսյանի իշխանության ժամանակ եղել են լրջագույն տարաձայնություններ Արցախի և Հայաստանի իշխանությունների մոտ հակամարտության կարգավորման կարևոր, առանցքային հարցերում, հետևաբար հիմա խոսել 100% համաձայնության մասին, դա աբսուրդ է, չկա նման բան»։
Խոսելով պետական կառավարման համակարգի մասին՝ «Մեկ Հայաստան» կուսակցության ղեկավարն ասաց, որ իշխանափոխությունից մեկ ու կես տարի հետո Հայաստանի նոր իշխանությունները դեռևս չեն կարողանում հասկանալ, ընկալել կառավարման կարևորագույն գործառույթների իրականացման տրամաբանությունը։

«Այսօր իշխանության բարձրագույն օղակներում են գտնվում մարդիկ, որոնք չունեն կազմակերպման, ղեկավարման և համակարգման բաղադրիչների գոնե նվազագույն փորձառություն ու գիտելիքներ։ Հետևաբար` ձախողումները, տապալումները, սխալներն ու թերությունները անխուսափելի են։ Վարչապետ Նիկոլ Փաշինյանը Կառավարության նիստում ասաց, որ չի կարողանում ստանալ իր համար կարևոր տեղեկատվություն, եթե սա պարզաբանենք մեր քաղաքացիների համար, ապա դա նշանակում է, որ երկրում օպերատիվ կառավարում չի իրականացվում»,-ասաց Ղազինյանը։

Նա ընդգծեց, որ այսօրվա Կառավարությունը չունի հնարավորություն ո՛չ տնտեսական և, ոչ էլ գործնական խնդիրները լուծելու համար և նաև չի կարող կառավարել այդ խնդիրները։

«Այսօր Հայաստանում գոյություն ունի օպերատիվ կառավարման ճգնաժամ , ՀՀ-ն չի կառավարվում։ Գնահատականները միգուցե սուր են, բայց օբյեկտիվ են և արտացոլում են այն պատկերը, որը ներկայացրեց Նիկոլ Փաշինյանն իր հայտնի պոռթկման ժամանակ»,-ասաց կուսակցության ղեկավարը։

Ղազինյանը անդրադարձավ նաև դատական համակարգին ու նշեց, որ անցնող տարին լի էր իրավական անվտանգությանն ուղղված սպառնալիքներով. «Եթե հիշում եք, այս տարի մայիսի 9-ին վարչապետ Նիկոլ Փաշինյանը հանդես եկավ դատարանների շենքերը շրջափակելու կոչով սա ՀՀ Սահմանադրության և մի շարք օրենքների բազմաթիվ կետերի կոպիտ խախտում էր, ինչն իր մեջ պարունակում է ոչ միայն քաղաքական, այլև իրավական որոշակի գնահատականներ։

Այնուհետև սկսվեցին հարձակումները դատական իշխանության նկատմամբ։ Գործող իշխանությունները դատական համակարգն ընդունեցին որպես քաղաքական ինստիտուտ և որոշեցին ստուգել դրա քաղաքական վստահելության աստիճանը։ Դա խորը մոլորություն է, քանի որ դատական համակարգը մասնագիտական կառույց է, որի վստահության աստիճանը չափվում է բացառապես նրանց վարույթում գտնվող գործերի ծավալով, քանակով և դատավարություններին մասնակցող սուբյեկտների թվով, և ես կարող եմ ասել, որ դատավորները գերծանրաբեռնված են»։

Հեղինակ՝ Սոնա Գեւորգյան

Աղբյուր` Փաստինֆո