Փաստ ինֆո

«Թրանսփարենսի ինտերնեշնլ» հակակոռուպցիոն կենտրոնի ծրագրերի համակարգող Վարուժան Հոկտանյանը ԸՕ-ում խնդիր է տեսնում՝ կապված նախընտրական հիմնադրամներին իրականացվող նվիրատվությունների կարգավորումների հետ:

«Փաստինֆո»-ի հետ զրույցում նա ասաց, որ 1999թ.-ին ընդունված ԸՕ-ն թույլատրում էր նվիրատվությունները իրավաբանական անձանցից: Երկրորդ ԸՕ -ն արգելեց իրավաբանական անձանց կողմից նախընտրական հիմնադրամներին նվիրատվություն կատարել, ինչը ստեղծեց տգեղ պրակտիկա , երբ այս կամ այն կազմակերպությունները այդ միջոցները անձերի միջոցով էին փոխանցում նախընտրական հիմնադրամներ:

Հիշեցնենք, վերջին օրերին քննարկման թեմա էր դարձել «Իմ քայլը» դաշինքի նախընտրական հիմնադրամին գործող պատգամավորների կատարած նվիրատվությունների հարցը: Անտիֆեյք կայքը գրել էր, որ «Իմ քայլը» դաշինքի ցուցակով առաջադրված պատգամավորի թեկնածուները խոշոր չափերի` 1-5 միլիոն դրամներ են փոխանցել հիմնադրամին այն պարագայում, երբ նրանցից շատերի կողմից 2018թ. դեկտեմբերի 9-ի ՀՀ ԱԺ արտահերթ ընտրությունների թեկնածուի գույքի և եկամուտների հայտարարագրում և Բարձրաստիճան պաշտոնատար անձանց էթիկայի հանձնաժողով ներկայացված տարեկան և պաշտոնատար անձի պաշտոնը ստանձնելու հայտարարագրերում հայտարարագրել են ավելի քիչ գումարներ։

Իշխող խմբակցության պատգամավոր Վահագն Հովակիմյանը այս տեղեկությունը կեղծիք է որակել ու հայտարարել է, թե «Իմ քայլը» հիմնադրամը դրամահավաք է իրականացրել եւ հենց այդ դրամահավաքի ընթացքում հավաքված գումարի մի մասն էլ «Իմ քայլը» դաշինքի պատգամավորության թեկնածուների կողմից մուտք է արվել նախընտրական հիմնադրամ՝ ՀՀ Կենտրոնական բանկում բացված հատուկ հաշվեհամարին:

Առհասարակ, սա , ըստ Հոկտանյանի, ընդունված պրակտիկա է, բայց այլ հարց է, երբ նվիրատվությունն արվում է իրավաբանական անձի միջոցներից: «Երբ իրավաբանական անձանց արգելվեց, նրանք փողը տալիս էին տարբեր ֆիզիկական անձանց ասում ՝ նվիրատվություն արեք մեր կողմից ու ինձ թվում է՝ այդ պրակտիկան շարունակվում է »,-մեզ հետ զրույցում նշեց Վարուժան Հոկտանյանը:

Այս համատեքստում Վարուժան Հոկտանյանը հիշեց Երեւանի քաղաքապետարանին որպես նվիրատվություն արված Կամազների պատմությունը: Ըստ նրա, եթե նախընտրական հիմնադրամին նվիրատվությունը իրավաբանական ընկերությունների ֆինանսական միջոցներով է արվում, առավել եւս օլիգարխների, այո ռիսկ կա՝ այսպես կոչված «ես ինձ, դու՝ քեզ սկզբունքը»:

Հոկտանյանը հիշեց, որ Արեւմուտքում տարիներ առաջ մի քանի հայտնի սկանդալներ եղել են, օրինակ` Ռումինիայում, երբ որոշ ընկերություններ նվիրատվություն էին արել կուսակցությանը, որը հաղթել էր, հետո նրանք ստացան մաքսային հարկային արտոնություններ:

Վարուժան Հոկտանյանը հուսով է, որ ԸՕ առաջիկա փոփոխությունները կրկին կթույլատրեն իրավաբանական անձանց նվիրատվությունը:

Աղբյուր` Փաստինֆո