Փաստ ինֆո

Արդյո՞ք պետական պահպանության հասկացության ենթադրում է նաեւ առանձին մեքենա տրամադրելը վարչապետի ընտանիքի անդամներին: «Փաստինֆո»-ի հետ զրույցում նման հարցադրում է հնչեցնում «Թրանսփարենսի ինթերնեշնլ» հակակոռուպցիոն կենտրոնի ծրագրերի համակարգող Վարուժան Հոկտանյանը:

«Պետական պահպանություն ես գիտեմ միայն թիկնապահ տրամադրելը»,-նշեց Վարուժան Հոկտանյանը՝ անդրադառնալով ՀՀ վարչապետ Նիկոլ Փաշինյանի ավագ դստեր՝ Մարիամ Փաշինյանի կողմից շահագործող մեքենայի շուրջ բարձրացած աղմուկին:

Հիշեցնենք, ըստ լրատվամիջոցների տեղեկությունների, ՀՀ վարչապետ Նիկոլ Փաշինյանի ավագ դստեր՝ Մարիամ Փաշինյանի համար պետական միջոցներից 27 հազար դոլար արժողությամբ 2019 արտադրության Nissan X Trail մակնիշի ամենագնաց է ձեռք բերվել: Մարիամ Փաշինյանը Ինստագրամի իր էջում տեսանյութեր է հրապարակում, որտեղ երաժշտության ուղեկցությամբ , ընկերների հետ վարում է մեքենան: Վարչապետի խոսնակ Վլադիմիր Կարապետյանը, մեկնաբանելով տեղեկությունը, հղում էր արել «Հատուկ պետական պաշտպանության ենթակա անձանց անվտանգության ապահովման մասին» ՀՀ օրենքի 6.1-րդ հոդվածին, որի 3-րդ կետը: Ըստ Կարապետյանի, մեքենան տրամադրվել է անվտանգության նկատառումներից ելնելով:

«Դեռ պետք է հասկանալ, մեքենա ձեռք է բերվել, թե տրվել է, որովհետեւ հակառակը սկանդալ կլինի, բայց եթե տրամադրվել է, պետք է հասկանալ, թե ինչի հիման վրա է տրամադրվել»,-կարծիք է հայտնում Վարուժան Հոկտանյանը: Նրա խոսքով, հիշատակված օրենքը միայն մեկ բան է ասում, որ պետական պահպանություն կարող է լինել նաեւ վարչապետի ընտանիքի անդամների համար: Նկատենք, որ մեկ այլ ՝ Պետական պաշտոններ զբաղեցրած անձանց սոցիալական երաշխիքների մասին ՀՀ օրենքի 7.6 հոդվածում , ի թիվս այլնի, նշվում է վարչապետին հատուկ նշանակության ավտոտրանսպորտի տրամադրման մասին, սակայն , այստեղ խոսք չկա վարչապետի ընտանիքի անդամների վերաբերյալ:

Վարչապետի դուստրը՝ Մարիամ Փաշինյանը Ֆեյսբուքում գրառմամբ անդրադարձել է խնդիրին ու նշել, որ մեքենան իրեն տրամադրվել է անվտանգությունից ելնելով եւ որ այն օգտագործվել է դեռեւս 2018 թվականին եւ չէր կարող լինել 2019 թվականի արտադրության։ Նա նաեւ մեղադրել է լրատվամիջոցներին՝ իր եւ իր ընտանիքի դեմ հրապարակումների համար:

«Դե միշտ էլ ով իշխել է, ամբողջ աշխարհում էլ, Հայաստանում էլ, ամեն ինչում վերջում լրատվամիջոցներն են մեղավոր դուրս գալիս»,-մեզ հետ զրույցում նկատում է Վարուժան Հոկտանյանը: Նա հիշեցրեց, որ արարողակարգային 3 բարձրաստիճան պաշտոնյաների՝ նախագահի, վարչապետի եւ ԱԺ նախագահի համար կատարվող ծախսերը, Գնումների մասին օրենքով, գաղտնի են եւ բաց աղբյուրներից այդ մասին տեղեկություն հանրությունը ստանալ չի կարող եւ դժվար թե իմանա , թե մեքենան ինչ միջոցներով ու որտեղից է ձեռք բերվել:

«Տրամադրումը ավելի մեղմ տարբերակ է, քան ձեռքբերումը: Եթե պետական պահպանություն տրամադրվել է Փաշինյանի աղջկան, որը օրինական էր, դա նշանակում է, որ կամ իր մեքենայում, եթե նա վարում է եւ իր անձնական մեքենան է, պետք է լինեն թիկնապահներ կամ պետական մեքենա պետք է լինի, որը կունենա վարորդ»,-կարծում է Հոկտանյանը:

Հարցին, արդյոք վարչապետի դստերն առանձին մեքենա տրամադրելը, իսկ դրանից առաջ Փաշինյանների զբաղեցրած առանձնատան նորոգումը տեղավորվում է այն համեստ ապրելակերպի քարոզի մեջ, որով իշխանության եկավ վարչապետ Փաշինյանը, Վարուժան Հոկտանյանը պատասխանեց . «Ես ձեռնպահ կլինեմ այդ հարցերը մեկնաբանելուց, ինձ համար այլ բան է կարեւոր, որքանով են արդյունավետ պետական բարձրաստիճան պաշտոնյաներն աշխատում, որքանով է իրենց աշխատանքը բերում ժողովրդի կենսամակարդակի աճին, ժողովրդավարության զարգացմանը»:

Ըստ Հոկտանյանի, ներկա դրությամբ ակնկալիքները, որոնք անձամբ ինքն է ունեցել է, չեն արդարացվել: «Չէի ասի , որ իրավիճակը էականորեն փոխվել է, չէի էլ ասի, որ իրավիճակը վատացել է, ինձ դա է մտահոգում, որ ինչ-որ բան, եթե փոխվում է, չափազանց դանդաղ է փոխվում եւ փոփոխությունը ոչ թե շնորհիվ արմատական տնտեսական , սոցիալական բարեփոխումների է, այլ հին համակարգը ավելի էֆեկտիվ աշխատացնել փորձերի»,-կարծիք հայտնեց Վարուժան Հոկտանյանը:

Աղբյուր` Փաստինֆո