Փաստ ինֆո

Երևանի ավագանու «Լույս» խմբակցության անդամները տեղյակ չեն եղել, որ «Լուսավոր Հայաստան» խմբակցության ղեկավար Էդմոն Մարուքյանը պատրաստվում է քննարկել «Լույս» խմբակցության ղեկավար Դավիթ Խաժակյանին մանդատից զրկելու հարցը։

«Լուսավոր Հայաստան» կուսակցությունն ինքն է որոշում իր ավագանու անդամին թողնում է քաղաքապետարանում, թե՞ հետ է կանչում կամ էլ փոխարինում ցուցակի հաջորդ համարով, մենք հարգում ենք կուսակցության ցանկացած որոշում»,-այս մասին այսօր լրագրողների հետ զրույցում ասաց Երևանի ավագանու «Լույս» խմբակցության անդամ Անի Խաչատրյանը։

Նա նշեց, որ երեկ խմբակցությունում անդամները հանդիպել են, բոլորը գոհ են եղել միմյանց ելույթներից ու վարքագծից. «Թե հետո ինչ է փոխվել՝ չեմ կարող ասել։ Դա կարող է մեկնաբանել բողոքող կողմը, եթե, իհարկե, բողոքում է, սակայն այդպիսին ես չեմ նկատել»։

Ավագանու «Լույս» խմբակցության անդամ Թեհմինա Վարդանյանն էլ ավելացրեց, որ «Լույս» խմբակցությունը, բոլոր մյուս խմբակցությունների նման, պարբերաբար քննարկումներ ունենում է, սակայն ԼՀԿ-ի ասուլիսն ու հայտարարություններն անակնկալ են եղել։

«Մենք դրա մասին իմացել ենք մամուլից ու մեզ ուղղակիորեն թույլ էլ չենք տալիս խառնվել ԼՀԿ-ի ներկուսակցական քննարկումներին և գործընթացներին, դա իրենց որոշելիքն է՝ կապված պարոն Խաժակյանի մանդատը դնել կամ չդնելու հետ»,-ասաց Վարդանյանը։

Մանրամասները՝  տեսանյութում։

Հեղինակ՝ Սոնա Գեւորգյան

Աղբյուր` Փաստինֆո