Փաստ ինֆո

Քաղաքապետ Հայկ Մարությանի պահվածքը ծայրահեղ էմոցիոնալ էր Երևանի ավագանու նիստի ժամանակ, ինչը բորբոքեց մեր խմբակցությանը։ Այսօր լրագրողների հետ հանդիպման ժամանակ նշեց Երեւանի ավագանու «Լույս» խմբակցության անդամ Թեհմինա Վարդանյանը:

Նա նշեց, որ քաղաքապետն ունի ավագանու 57 անդամ, որոնք կարող են ընդմիշտ գովաբանել քաղաքապետի աշխատանքը, եւ կա ընդդիմություն, որի կարծիքի հետ պետք է հաշվի նստել:

«Եթե ընդդիմությունը որեւէ խնդիր է բարձրաձայնում, պետք չի հեգնել, ծաղրել ու ծիծաղել»,-ասաց նա:

Հարցին՝ արդյոք Երեւանի ավագանու նիստում իր ելույթը անձնական դաշտ մտնել չէր, Թեհմինա Վարդանյանը պատասխանեց. «Իսկ դուք քաղաքապետի ծիծաղը սուր չե՞ք համարում, նորմա՞լ եք համարում, որ ավագանու անդամի ելույթի ժամանակ նրան ընդհատում է քաղաքապետի խորհրդականը, որն այդ իրավունքը չունի: Գուցե երբեմն իմ քննադատությունները սուր են, բայց դա բնական է, այդտեղ բացարձակ անձնական հարթություն չկա»:

Նա նշեց, որ եթե Դավիթ Խաժակյանը մանդատը վայր դնի, ապա կորելու է իրենց շատ թանկագին գործընկերը. «Մենք արդեն շուրջ 3 տարի աշխատում ենք միասին և դա կարող է մեզ համար ցավալի լինել»։

«Լույս» խմբակցության անդամ Անի Խաչատրյանն ասաց. «Իհարկե, մեր դիրքերը չեն թուլանա, մենք շարունակելու ենք մեր գործունեությունը, ինչպես եղել է:

Մեր քաղաքական օրակարգում ոչինչ չի փոխվել»:

Հիշեցնենք, որ այսօր առավոտյան «Լուսավոր Հայաստան» կուսակցության ղեկավար Էդմոն Մարուքյանն իր ֆեյսբուքյան էջում գրել էր. «Լուսավոր Հայաստան» կուսակցությունն այժմ քննարկում է Երևանի ավագանիում իր միակ անդամին` Դավիթ Խաժակյանին հետ կանչելու և ավագանիում նրա գործունեության շարունակության նպատակահարմարության հարցը»։

Մանրամասները՝ տեսանյութում

Հեղինակ՝ Սոնա Գեւորգյան

Աղբյուր` Փաստինֆո