Փաստ ինֆո

Ավելի լավ էր, որ «Տարոն Ավիան» դիմեց Եվրոպա՝ չվերթներ իրականացնելու համար և այնտեղ նկատեցին խնդիրները, որ մենք կարողանանք լուծել դրանք, հակառակ դեպքում կարող էր ևս 5-10 տարի այսպես շարունակվել, ինչը մեզ պետք չէր։ Լրագրողների հետ զրույցում այս մասին ասաց Քաղավիացիայի կոմիտեի նախագահ Տաթևիկ Ռևազյանը՝ անդրադառնալով այն տեղեկությանը, որ Եվրոպական հանձնաժողովը խստացված հսկողություն է սահմանել Հայաստանի քաղաքվիացիայի կոմիտեի նկատմամբ։

«Այս խնդիրը 1.5 տարվա խնդիր չէ, վերջերս չի առաջացել։ Պարզապես մեր ավիաընկերությունները հիմա են դիմել Եվրոպական միություն՝ չվերթներ իրականացնելու և նրանք էլ նման աուդիտ են անցկացրել»,-նշեց Տաթևիկ Ռևազյանը։

Նա հերքեց լուրերն այն մասին, որ «Տարոն Ավիան» փակել են, որպեսզի «Ryan Air»-ի համար դաշտ ստեղծեն։ Տաթևիկ Ռևազյանն հայտնեց, որ «Տարոն Ավիան վաղուց է, ինչ Հայաստանում չվերթներ չի իրականացնում։ Չվերթներ իրականացրել է Աֆրիկայում, հետևաբար Ryan Air-ը նրա համար մրցակից չի եղել։ Բայց պետք չի ասել, որ «Տարոն Ավիա»-ի մեղքով է, որ Եվրոպական հանձնաժողովը նման որոշում է կայացրել»,-ասաց Տաթևիկ Ռևազյանը՝ ընդգծելով, որ «Տարոն Ավիա»-ի հետ համատեղ են որոշել փակել ավիաընկերությունը, որպեսզի որևէ ավիաընկերություն Հայաստանում չհայտնվի սև ցուցակում։

Տաթևիկ Ռևազյանը նկատեց նաև, որ եթե քաղավիացիայում աշխատավարձերը ցածր են, և լավ մասնագետները գնում են մասնավորում աշխատելու, դժվար է հսկողությունն ապահովել այն մակարդակով, որը պահանջվում է։ Քաղավիացիայի կոմիտեի նախագահը հայտնեց՝ արդեն կոնկրետ քայլեր են սկսել ձեռնարկել, որ օրենսդրության մեջ փոփոխություններ կատարվեն, ինչն էլ թույլ կտա բարձրացնել աշխատավարձերը. «Դա բյուջեի հաշվին չի լինելու, այլ պետք է սկսենք գումարներ գանձել մեր ծառայությունների համար։ Ամբողջ աշխարհում դա ընդունված տարբերակ է։ Ես անձամբ այս մեկ տարվա ընթացքում խոսել եմ ավելի քան 80 երկրների քաղավիացիայի ղեկավարների հետ, և բոլորն ասել են, որ պետք է դառնանք ինքնաֆինանսավորվող կառույց, որը գումարներ է գանձում օրինակ ավիաընկերություն գրանցելուց։ Հոլանդիայում, եթե ուզում ես ավիաընկերություն գրանցել, վճարում ես 25 հազ եվրո, իսկ Հայաստանում դա անվճար է։

Եթե օդաչու ես և ուզում ես լիցենզիան երկարաձգել, ՀՀ-ում դա նույնպես անվճար է։ Երբ սկսենք մեր ծառայությունների համար գումարներ գանձել, կունենանք այն ֆինանսները, որ կարողանանք կտրուկ բարձրացնել աշխատավարձերը, ներգրավել նոր մասնագետներ և վերապատրաստել բոլորին»,-հավելեց Տաթևիկ Ռևազյանը։

Ինչ վերաբերում է տեղական փոխադրողին, ապա Տաթևիկ Ռևազյանը հայտնեց, որ քաղավիացիայի կոմիտեին դիմել է մեկ ավիաընկերություն և այժմ ուսումնասիրություններն են իրականացվում. «Եթե ամեն ինչ նորմալ անցնի, կունենանք տեղական փոխադրող, որն ունենալու է 388 հազար նստատեղ»,-ասաց Տաթևիկ Ռևազյանը։

մանրամասները՝ տեսանյութում

Հեղինակ՝ Հասմիկ Կոշկարյան

Աղբյուր` Փաստինֆո