Փաստ ինֆո

Հատուկ քննչական ծառայությունը պաշտոնապես  հայտարարել է ՀՀ ԱԺ նախկին նախագահ Արա Բաբլոյանի գործով նախաքննության ավարտի մասին։ Ինչպես արդեն տեղեկացրել ենք Արա Բաբլոյանը մեղադրվում է ՀՀ քրեական օրենսգրքի 300-րդ հոդվածի և 314-րդ հոդվածի 1-ին մասերով`մի խումբ պաշտոնատար անձանց հետ ՀՀ սահմանադրական դատարանի լիազորություններին տիրանալու, ինչպես նաև պաշտոնեական կեղծիք կատարելու մեջ: «Փաստինֆո»-ն զրուցել է Արա Բաբլոյանի պաշտպան Արամ Վարդևանյանի հետ։

-  Նախաքննությունն ավարտվեց, գործը քանի՞ հատոր է, արդեն ծանոթացե՞լ եք։

-  Քրեական գործը բաղկացած էր հինգ հատորից և, ըստ էության, ծանոթանալու համար ողջամիտ ժամկետ տրամադրվել էր։ Հիմա հատորների մանրամասներին չեմ անդրադառնա, բայց վստահեցնում եմ, որ ամբողջ գործն իր բոլոր մանրամասներով տիրապետում եմ՝  առկա  բոլոր խնդիրներին։  Պարոն Բաբլոյանն էլ վերջերս հստակ ասաց, որ մենք ամբողջությամբ պատրաստ ենք նաև այն տարբերակին, որ գործն ուղարկվի դատարան և ես կարծում եմ՝ արդեն դատարանում գործի քննությունը շատ հետաքրքիր կլինի հանրությանը։ Բայց առնվազն ես գտնում եմ, որ նման ապացուցողական բազայով քրեական գործը չի կարող դատարան ուղարկվել։ Այդ հարցի վերաբերյալ միջնորդություն ներկայացվել էր թե՛ քննիչին, այսինքն` վարույթն իրականացնող մարմնին, այնուհետև բողոք էր ներկայացվել նաեւ հսկողություն իրականացնող դատախազին։ Կարելի է ասել այս ժամանակահատվածում, երբ մեղադրական եզրակացությունը պետք է հաստատվի կամ վերադարձվի, մերժվի, դրան զուգահեռ պետք է անդրադարձ կատարվի նաև այն բողոքին, որը ներկայացրել էինք։ Կարող եմ հստակորեն ասել, որ Արա Բաբլոյանի գործողությունները եղել են ամբողջությամբ իրավաչափ։ Արա Բաբլոյանի նկատմամբ այս ամենը, ըստ էության, հարվածում է նրա բարի համբավին,  բարի հեղինակությանը։ Երբ արդեն ապացույցներն ամբողջությամբ հասանելի կլինեն և հասարակությունը կտեղեկանա, թե ինչ է ենթադրաբար կատարել պարոն Բաբլոյանը, պարզ կլինի,  որ ամբողջությամբ իր գործողությունները եղել են իրավաչափ, բխել են Սահմանադրությունից և օրենքից։

-  Պատրա՞ստ եք դատական պրոցեսին։

-  Շատ հստակ եմ տեսնում հանցակազմի բացակայությունը և հույս ունեմ, որ դա նաև դատախազությունում ևս կնկատեն, քանի որ ի վերջո քննիչը կարող է կատարել իր գործը լավ կամ վատ, բայց դատարանում ամբողջ պատասխանատվությունն ընկնում է դատախազության վրա։ Սա որոշակիորեն այն բարդ իրավիճակն է մեր քրեադատավարական օրենսդրության, քանի որ դատախազությունը նախաքննության փուլում ունի պասիվ դերակատարում, բայց դատարանում առավել ակտիվ է և միակ ակտիվ դերակատարը մեղադրանքի կողմից, իսկ քննիչն այլևս որևէ դերակատարում չի ունենում, հետևաբար քննիչի բացթողումների, թերի քրեական գործի ամբողջ պատասխանատվությունն ընկնում է դատախազության վրա։ Հույս ունեմ, որ դատախազության կողմից թե՛ մեր բողոքը, թե՛ նաև հենց քրեական գործի նյութերի ուսումնասիրությունը կհանգեցնի այն հստակ հետևությունների, որ առնվազն մեղադրական եզրակացությունը չի կարող հաստատվել։

-  Իսկ եթե ամեն դեպքում մեղադրական եզրակացությունը հաստատվի և գործն ուղարկվի դատարան, կհամարեք, որ Արա Բաբլոյանի նկատմամբ քրեական հետապնդու՞մ է իրականացվում։

-  Այս փուլում այդ հարցին չեմ անդրադառնա, քանի որ, կարծում եմ, պետք է այդ և այլ հարցերին անդրադառնալ, երբ մենք վերջնական կունենանք նախաքննության ավարտ։ Թեև նախաքննության ավարտը հայտարարվել է, բայց փաստացի քանի դեռ դատախազությունը չի հաստատել մեղադրական եզրակացությունը, մենք որոշակիորեն գտնվում ենք գաղտնիության ռեժիմում։ Հենց այդ պատճառով այս պահին զերծ կմնամ ամփոփող գնահատական տալուց և կարծում եմ՝ հանրությանն էլ շատ հետաքրքիր կլինեն այն ապացույցները, որոնք կներկայացվեն, որոնք ուղղակիորեն վկայում, փաստում են Արա Բաբլոյանի ամբողջությամբ արդար և իր գործողություններում օրինականությունը պահպանելու վերաբերյալ։

-  Արա Բաբլոյանի նկատմամբ իրականացվող քրեական հետապնդումը դատական կարգով բողոքարկելու՞ եք։

-  Մենք դրա վերաբերյալ ներկայացրել էինք բողոք ՀՀ գլխավոր դատախազին, որի վերաբերյալ թեև ստացանք մերժում, բայց այնտեղ շատ կարևոր արձանագրում կար, որը կատարվել էր դատախազության կողմից։ Դա վերաբերում էր նրան, որ հստակ ցուցում էր տրվել՝  մեր կողմից բարձրաձայնված հարցերի վերաբերյալ պատշաճ գործողություններ կատարելու մասին։ Ես իմ պրակտիկայում այդպիսի երևույթ չէի հանդիպել, բայց փաստորեն մեր բողոքը թեև մերժվել էր, բայց զուգահեռաբար կար ցուցում՝ մեր կողմից բարձրացված հարցերին պատշաճ անդրադարձ կատարելու, որոնք հենց վկայում են Արա Բաբլոյանի գործողությունների լիարժեք օրինականության վերաբերյալ։ Դա որոշակիորեն զսպող էֆեկտ էր իրենից ենթադրում։ Այսինքն՝ դրանով մենք ուղղակիորեն կոնֆրոնտացիայի մեջ չէինք գտնվում։ Կտեսնենք արդյունքը, քանի որ հենց նույն այդ հանգամանքը ևս այս փուլում՝ մեղադրական եզրակացությունը հաստատելու փուլում, պետք է դատախազությունը ևս գնահատականի արժանացնի։ Քանի որ վերջիններիս կողմից բողոքը մերժելու հետ զուգահեռաբար նման ցուցում էր տրվել։

-  Ամեն դեպքում ի՞նչ եք ակնկալում դատախազությունից։

-  Մշտապես փորձում եմ լինել դրականն ակնկալող, միշտ փորձում եմ լինել օպտիմիստ։ Ամեն դեպքում ակնկալում եմ, որ դատախազության կողմից հաշվի կառնվի իրավունքի գերակայություն, հաշվի կառնվի օբյեկտիվությունը և հաշվի կառնվի սույն քրեական գործով մի շարք դատավարական խախտումները, որոնք տեղի են ունեցել։ Այսպիսի քրեական գործը, այսպիսի հատորներով և ապացույցներով վկայում է Արա Բաբլոյանի նկատմամբ քրեական հետապնդումը դադարեցնելու հիմքի մասին։ Բայց եթե, այնուամենայնիվ, գործն ուղարկվի դատարան, դրան մենք պատրաստ ենք։

-  Մասնավորապես դատավարական ի՞նչ խախտումների մասին է խոսքը։

-  Այս փուլում դրանից զերծ կմնամ, բայց վստահեցնում եմ, որ եթե մի քանի օր սպասեք և եթե մեղադրական եզրակացությունը հաստատվեց այն ձևով, ինչպես կա, մենք ամենայն մանրամասնություններով կներկայացնենք բոլոր այդ խնդիրները և վստահեցնում եմ՝ հանրությանն էլ շատ հետաքրքիր կլինի։ Այսինքն` ինչ ապացույցներով է այս քրեական գործը, բայց այս փուլում զերծ կմնամ դրանից, քանի որ գտնում եմ, որ ամեն մի քրեադատավարական փուլ ունի իր նպատակը և էությունը։ Սա այժմ գտնվում է դատախազության կողմից իր դատավարական պարտականությունների, լիազորությունների իրացման փուլում։ Հետևաբար` պետք է ակնկալել դատախազության գործողությունները։ Այն, ինչ դատավարական իմաստով հնարավոր էր կատարել որպես պաշտպան, ես առավելագույնը կատարել եմ՝ այդ թվում նաև դատախազությանը բողոք ներկայացնելով։ Այժմ պետք է սպասենք, տեսնենք նրանց արձագանքին։ Ըստ էության հնգօրյա ժամկետն է մեղադրական եզրակացությունը հաստատել կամ մերժել։

 Հեղինակ՝ Հասմիկ Կոշկարյան

Աղբյուր` Փաստինֆո