Փաստ ինֆո

Մեզ մոտ ավիացիայի ոլորտում շատ մեծ թերություն կա։ «Փաստինֆո»-ի հետ զրույցում այս մասին ասաց ՀՀ ազգային ավիացիոն միավորման նախագահ Դմիտրի Աթբաշյանը։

«Բոլոր ինքնաթիռներն ունեն սև արկղեր։ Յուրաքանչյուր թռիչք վերահսկողության տակ է պահվում այդ թվում նաև սև արկղերի միջոցով։ Գոյություն ունեն Home check, transit check, A check, B check և այս բոլոր ստուգումներն անպայման արվում են՝ օգտագործելով այն ինֆորմացիան, որը կարդացվում է սև արկղերից։ Մեր կոմիտեն, սակայն, այդ սև արկղերը կարդալու և ուսումնասիրելու հնարավորություն չունի, ինչը մեծ թերություն է»,-ասաց Դմիտրի Աթբաշյանը։

Նրա խոսքով` պլանավորման, կատարման և ստուգման ֆունկցիաներն ուրիշ երկրներում բաժանված են։ Դրանցով զբաղվում են երեք տարբեր մարմիններ, մեկը պլանավորում է, մյուսը կատարում, երրորդը՝ ստուգում. «Ամերիկայում գոյություն ունի ֆեդերալ ավիացիոն ադմինիստրացիա, որը կարգավորում է քաղավիացիայի աշխատանքները։ Կա նաև առանձին բյուրո, որը վերահսկողության տակ է պահում թռիչքների անվտանգությունը։ Այդ բյուրոն ոչ մեկին չի ենթարկվում, այդ թվում նաև երկրի նախագահին, միայն կոնգրեսին է ենթարկվում։

Այդկերպ նրանք վերահսկողություն են սահմանում թռիչքների անվտանգության վրա»,-նշեց փորձագետը։
Նա նկատեց՝ Հայաստանում խնդիր կա, քանի որ մինչև հիմա չունենք կատարելագործված օդային իրավաբանական դաշտ. «Հայաստանն աշխարհի միակ երկիրն է, որը չունի օդային օրենսգիրք։ Գործում է ավիացիայի մասին օրենքը, որի մեջ մեծ բացթողումներ կան։ Այսինքն ավիացիայի մասին օրենքը կապում են մյուս օրենքների հետ։ Շատ խառը վիճակ ։ Իրավաբանական դաշտում մութ տեղեր կան, ինչը պրոբլեմ է»,-հավելեց Դմիտրի Աթբաշյանը։

Նա համաձայն է, որ Քաղավիացիայի կոմիտեն դառնա ինքնաֆինանսավորվող. «Կոմիտեն գործող ավիաընկերություններին անվճար է սպասարկում։ Այդ ծառայությունների դիմաց ընկերությունները թող ֆինանսավորեն մեր կոմիտեի աշխատանքների գոնե մի մասը»,-հավելեց փորձագետը։

Ավելի վաղ հայտնել էինք, որ Եվրոպական հանձնաժողովն ուժեղացված հսկողություն է սահմանել Հայաստանի քաղավիացիայի պետական կոմիտեի նկատմամբ։ Քաղավիացիայի կոմիտեի նախագահ Տաթևիկ Ռևազյանը նշել էր, որ խնդիրն առաջացել է այն ժամանակ, երբ «Տարոն Ավիա»-ն ցանկացել է չվերթներ իրականացնել դեպի Եվրոպա, սակայն չի անցել, քանի որ լուրջ խնդիրներ են հայտնաբերվել, որոնք ազդել են թռիչքային անվտանգության վրա։ Տաթևիկ Ռևազյանը լրագրողների հետ զրույցում ասաց, որ դրանք նոր խնդիրներ չեն, դրանք կային վաղուց։ Բացթողումը նա պայմանավորեց ռեսուրսների բացակայությամբ, ինչպես նաև աշխատավարձերի ցածր լինելով։ Տաթևիկ Ռևազյանը հայտնեց, որ պատրաստվում են օրենսդրության մեջ փոփոխություններ կատարել, ինչը թույլ կտա աշխատավարձերը բարձրացնել. «Դա բյուջեի հաշվին չի լինելու, այլ պետք է սկսենք գումարներ գանձել մեր ծառայությունների համար։ Ամբողջ աշխարհում դա ընդունված տարբերակ է։ Ես անձամբ այս մեկ տարվա ընթացքում խոսել եմ ավելի քան 80 երկրների քաղավիացիայի ղեկավարների հետ, և բոլորն ասել են, որ պետք է դառնանք ինքնաֆինանսավորվող կառույց, որը գումարներ է գանձում՝ օրինակ ավիաընկերություն գրանցելուց։ Հոլանդիայում, եթե ուզում ես ավիաընկերություն գրանցել, վճարում ես 25 հազ եվրո, իսկ Հայաստանում դա անվճար է։ Երբ սկսենք մեր ծառայությունների համար գումարներ գանձել, կունենանք այն ֆինանսները, որ կարողանանք կտրուկ բարձրացնել աշխատավարձերը, ներգրավել նոր մասնագետներ և վերապատրաստել բոլորին»,-լրագրողների հետ զրույցում նշել էր Տաթևիկ Ռևազյանը։

Հեղինակ՝ Հասմիկ Կոշկարյան

Աղբյուր` Փաստինֆո