Փաստ ինֆո

Դատական համակարգում առկա իրավիճակը պայմանավորել ՍԴ մեկ դատավորի անարդյունավետ աշխատանքով, պարզապես քաղաքական մանիպուլյացիա է։ Այս մասին այսօր ԱԺ խորհրդարանական ճեպազրույցների ժամանակ ասաց «Լուսավոր Հայաստան» խմբակցության պատգամավոր Տարոն Սիմոնյանը։

Նա նշեց, որ եթե գումար կա այդ համակարգը բարեփոխելու և զարգացնելու համար, ապա կարելի է ավելացնել դատավորների քանակը, սակայն այս առաջարկն իշխանությունը մերժում է այն հիմնավորմամբ, որ բյուջեում գումար չկա։

«Կարծում եմ՝ մենք անհարկի չափազանցրել ենք ՍԴ նախագահի դերը, և այս նախագիծը, որ բերվում է միայն ՍԴ նախագահի հետ կապված հարցը լուծելու համար, որևէ տրամաբանական կապ չունի այն նպատակների հետ, որ իր առջև դրել է քաղաքական իշխանությունը։ Ավելին, նրանք բազմիցս ամեն հնարավոր առիթով նշում են, որ դատական համակարգի բարեփոխումներով են զբաղվում։ Ես որպես նախկին փաստաբան, կարող եմ ասել, որ այս հարցն առաջնային է և տնտեսական զարգացման ամենամեծ խոչընդոտներից մեկը դատարանների անարդյունավետ աշխատանքն է»,-ասաց Սիմոնյանը։

ԼՀԿ պատգամավորն անդրադառնալով Ալեն ՍԻմոնյանի հայտարարությանը, թե դատավորների վաղ կենսաթոշակային համակարգի ներդրման օրենքի նախագծով իշխանությունը ձեռք է մեկնում ՍԴ դատավորներին՝ ասաց եթե ձեռք են մեկնում, թող այն մեկնեն իրենց հաշվին և ոչ թե հարկատուների։

«Հասկանում ենք, որ քաղաքացիներն ընտրել են այս իշխանությանը, բայց նրա առջև դրել են խնդիր ոչ թե իր գրպանի հաշվին թոշակի ուղարկել՝ իրենց խոսքով նախկին ռեժիմի դատական համակարգում մնացած անձանց, այլ հեղափոխության գաղափարական արժեհամակարգերն իջեցնել մինչև այն նույն քաղաքացիներ։

Սա որևէ ձևով մեկնված ձեռք չեմ կարող համարել դեպի ՍԴ, բայց մեկնված ձեռք կարող եմ համարել քաղաքական իշխանության և ՍԴ դատավորների առջև, բայց եթե քաղաքական իշխանությունն ինքն է ձեռք մեկնում, թող բարի լինի իր գրպանից համապատասխան փոխհատուցում տա»,-ասաց Սիմոնյանը։

Նա նշեց,ո ր օրենքում բարոյական առումով խնդիր տեսնում է, քանի որ այս կերպ դատավորները վաճառում են իրենց մասնագիտական բարոյականությունը փողի դիմաց. «Հույս ունեմ՝ ոչ մի դատավոր այս մեկնած ձեռքը չի սեղմի և վնաս պատճառի ՀՀ որևէ քաղաքացու»։

Հեղինակ՝ Սոնա Գեւորգյան

Աղբյուր` Փաստինֆո