Փաստ ինֆո

ՀՀ Կառավարությունը խնդիր ենք դրել, որպեսզի հնարավորինս մեծ թվով քաղաքացիներ Ամանորը նշեն Հայաստանում։

«Իհարկե մենք հասկանում ենք, որ մի տարվա ընթացքում այս խնդիրը ամբողջապես չենք լուծի, բայց մենք նկատի ունենք ամեն տարի այս ավանդույթն ավելի ու ավելի մեծ ծավալներ պետք է ստանա։ Այս ներդրմամբ ուզում ենք էլ ավելի խթանել դեպի Հայաստան տուրիստների հոսքը դեպի Հայաստան, և ես խնդիր եմ ձևակերպել, որ Հայաստանը տուրիզմի համար սեզոնայնություն պետք է չունենա»,-այս մասին այսօր ուղիղ եթերում ասաց ՀՀ վարչապետ Նիկոլ Փաշինյանը՝ անդրադառնալով Ամանորյա ներդրումներին։

Նա նշեց, որ Կառավարությունը ցանկություն ունի որոշակի սրբագրումներ մտցնել Ամանորի բովանդակության և սոցիալական ազդեցության տեսակետից. «Շատ է խոսվում այն մասին, թե արժե՞ այդքան գումար ծախսել, երբ մեր երկրում բազմաթիվ սոցիալապես անապահով կամ ոչ այնքան ապահով մարդիկ կան։ Այդ միջավայրը, որ ստեղծվում է Հանրապետության հրապարակում, իմ կարծիքով, հենց առաջին հերթին սոցիալապես կամ այսպես կոչված ամենօրյա ավանդական  ծախսեր իրականացնելու հնարավորություն չունեցող մարդկանց հնարավորություն է տալիս, որ իրենց ունեցած հնարավորությունների սահմաններում շատ ուրախ, շատ բարձր մակարդակով նշեն Ամանորը։ Այդ հատվածում նաև աշխատելու են սննդի օբյեկտները, լինելու են արագ սննդի կետեր և մարդիկ կարող են իրենց երեխաների հետ գալ Հանրապետության հրապարակ, Երևանի 2750-ամյակի այգում լինելու են տաղավարներ, որտեղ վաճառվելու են բրդուճներ, համբուրգերներ...»։

Վարչապետն ընդգծեց, որ Ամանորը Հայաստանում ավելի լայն միջավայրում նշելու հարթ են ցանկանում ստեղծել, ի կատարումն այն կարգախոսի,թե. «Հայաստանն իմ օջախն է ժողովուրդն՝ իմ ընտանիքը»։

«Մենք ուզում ենք Ամանորյա ընտանիքի շրջանակը կամ միջավայրն ավելի մեծացնել, իհարկե, ինչը չի հակասում ավելի փոքր միջավայրում այն նշելու ավանդույթին։ Մեկը մյուսին այս պարագայում կարող են շարունակել և միմյանց համար ավելի լավ միջավայր ստեղծել։ Դեկտեմբերի 21-ից հունվարի 5-6-ը այդ միջոցառումները սկսվելու են։ Երեկ նախագծերը տեսել եմ և եթե այն ինչ նախագծված է ճշգրիտ ստանան, բոլորովին նոր գեղագիտություն, միջավայր ենք ստանալու»,-ասաց ՀՀ վարչապետն ու շեշտեց, որ ուզում են այնպես անել, որ երեխաները ոչ թե նայեն իրենց և հարևանների սեղաններին, այլ բեմերին նայելով զարգացնեն վիզուալ գեղագիտությունը։

Մանրամասները՝ տեսանյութում

Աղբյուր` Փաստինֆո