Փաստ ինֆո

Չի կարելի ասել, որ Արցախը պետք է մասնակցի, որպեսզի բանակցությունները լիարժեք լինեն և միաժամանակ ասել, որ նույն կեցվածքն ունենք։ Լրագրողների հետ հանդիպման ժամանակ այս մասին ասաց ՀՅԴ բյուրոյի անդամ Կիրո Մանոյանը՝ անդրադառնալով ԼՂ հակամարտության վերաբերյալ ընթացող բանակցությունների ընթացքին։ 

«Կարող ենք ասել՝ համադրված են, բայց երբ վարչապետն ասում է՝ 100 տոկոսանոց նույնական են, դա խնդիր է։ Ոչ թե խնդիր է, որ նույնական են, այլ ասելուց հետ չես կարող ասել, որ Արցախն էլ պետք է մասնակցի, որովհետև տարբեր կարծիք պետք է ունենան։ Դրա համար մենք ասում ենք, որ անհրաժեշտ է Արցախի Հանրապետության և Հայաստանի Հանրապետության միջև ստորագրվի ռազմաքաղաքական պայմանագիր, որտեղ այս ամենը հստակ կլինի։ Հստակ կասվի, որ Հայաստանը կարող է միջազգային ատյաններում պաշտպանել Արցախի շահը, բայց չի կարող Արցախին փոխարինել»,-նշեց Կիրո Մանոյանը։

Նա նկատեց, որ բանակցությունների գծով այն, որ երկու երկրների ԱԳ նախարարները համաձայնվել են հաջորդ տարվա սկզբին հանդիպել դրական է, բայց թե ինչի մասին են խոսել Կիրո Մանոյանի փոխանցմամբ պարզ չէ. «Այն փաստը, որ այդ եռակողմ հաղորդակցությունը հնգակողմ չի եղել, նշանակում է, որ Ադրբեջանը և Հայաստանը համաձայն չեն եղել դրա բովանդակությանը։ Հասկանալի է, որ Հայաստանն էլ կարող է չուզեր, որ իր ստորագրությունը չլինի մի փաստաթղթի տակ, որտեղ խոսվում է Մադրիդյան սկզբունքների մասին, որովհետև ինչպես վարչապետն ասել էր Հայաստանի իշխանությունների համար որոշակի պարզաբանումներ պետք է լինեն։ Կամ եղել են և չեն բավարարել Հայաստանին, կամ չեն եղել այդ պարզաբանումները։Ադրբեջանն էլ դեմ է այդ սկզբունքներից գոնե երկուսին, որ հարցը խաղաղ կերպով պետք է լուծվի և որ Արցախը պետք է իր կամքն արտահայտի իր կարգավիճակի մասին»,-ասաց Կիրո Մանոյանը։

Անդրադառնալով շրջանառվող այն լուրերին, որ Ադրբեջանը ցանկանում է բանակցություններին մասնակցի նաև ԼՂ ադրբեջանական համայնքը, Կիրո Մանոյանը նկատեց, որ եթե մեծ ձևաչափով պետք է հանդիպեն, ապա չի կարծում դիմացի կողմը պետք է առարկի՝ ով կլինի Ալիևի պատվիրակության մեջ. «Միշտ էլ այնպես է եղել, որ բացի զինադադարի ստորագրումից, ուղղակի բանակցությունների հարցով ԵԱՀԿ-ի պատկերացումը, երբ ասել է՝ Լեռնային Ղարաբաղն էլ պետք է մասնակցի, այդտեղ նաև եղել են ադրբեջանական համայնքի ներկայացուցիչներ, որոնք, սակայն, չեն ցանկացել նստել արցախցիների հետ, դրա համար էլ նստել են Ադրբեջանի պատվիրակության հետ։ Ձևաչափը ինչպես կարող ենք պատկերացնել, որ եթե երկու հոգով նստել են, այդ մնացածը որտեղ են նստելու, այսինքն` երբ պատվիրակություն չէ միայն ղեկավարներն են։ Եթե երեք հոգով են նստել, այսինքն ԱՀ նախագահը, ՀՀ վարչապետը և Ադրբեջանի նախագահը, պարզ է, որ այդտեղ էլ տեղ չունի ադրբեջանական համայնքը կամ եթե ունենա էլ դա ձևական ու անիմաստ բան է։ Ի՞նչ պետք է ասեն, չե՞նք կրակում։ Իհարկե, նրանք չեն կրակում, կրակողները ադրբեջանական բանակից են»,-հավելեց Կիրո Մանոյանը։

Մանրամասները՝ տեսանյութում։

Հեղինակ՝ Հասմիկ Կոշկարյան

Աղբյուր` Փաստինֆո