Փաստ ինֆո

Նորմալ եմ վերաբերում բոլոր կարծիքներին։ Շարունակում եմ նույնը պնդել, բայց այլ ձևակերպմամբ։ Լրագրողների հետ զրույցում ասել է ԱԺ «Իմ քայլը» խմբակցության պատգամավոր Հրաչյա Հակոբյանը՝ անդրադառնալով երեկ ԱԺ-ում իր արտահայտության վերաբերյալ հնչող քննադատություններին։

Նշենք, որ երեկ ԱԺ-ում ծխախոտի օգտագործման սահմանափակման վերաբերյալ օրինագծի քննարկման ժամանակ պատգամավորն իր ելույթում նշել էր, որ «Պետք է բոլոր ծխողները դառնան վտարանդի»։ Նրա այս հայտարարությունը քննադատվեց շատերի կողմից, իրավաբան Ռուբեն Հայրապետյանն էլ հայտնեց, որ պատրաստվում է դիմել ԱԺ՝ Հրաչյա Հակոբյանի վարքը քննելու համար էթիկայի հանձնաժողով ստեղծելու պահանջով։ Իրավաբանի վստահեցմամբ պատգամավորն այս արտահայտությամբ խախտել է էթիկայի կանոնները։

«Ի սկզբանե իմ ընտրած բառը, որը նույնպես դիպուկ չեմ համարում, изгой բառն էր, որին փոխարինող բառ հայերենում չկա և ինձ դահլիճից հուշեցին, որ դրան փոխարինում է վտարանդի բառը և ես շարունակեցի այդ բառով ձևակերպել իմ միտքը, սակայն ասելիքս ուղղված էր ոչ թե վտարանդի լինելուն, այլ մեկուսացված լինելուն»,-ասաց Հրաչյա Հակոբյանը՝ հավելելով, որ ընդունում է բոլոր այն մեկնաբանությունները, մեղադրանքները, որ հնչում են իր ասածի հասցեին, սակայն նա ցանկանում էր ասել, որ պետք է մի փոքր մեկուսացված լինել, որովհետև հանրային վայրերում չի կարելի ծխախոտը պրոպագանդել.

«Ծխողն իր տան մեջ պետք է ծխելու ընթացքում մեկուսացված լինի, պետք է դուրս գա գոնե պատշգամբում ծխի։ Չպետք է իր երեխայի ներկայությամբ բազմոցին նստած ֆիլմ դիտի, ծխի ու ասի՝ տղա ջան ծխելը լավ բան չի, մի՛ ծխիր։ Ասելիքս դա էր։ Ընդամենը 24 ժամ ավել ֆեյսբուքում ապահովեցի ինչ-որ իրարանցում։ Շատ ավելի տեղին էր մեկուսացած բառը, որն ուղղակի այդ պահին մտքիս չեկավ»,-ասաց Հրաչյա Հակոբյանը։

Հարցին՝ նա ծխում է, թե ոչ, Հրաչյա Հակոբյանն ասաց, որ քիչ է ծխում. «Զգացել եմ, որ եթե հիմա Երևանում գտնվում եմ մի սրճարանում, որտեղ ծխել չի կարելի, ես երբեք դուրս չեմ գալիս՝ դրսում ծխելու, բայց եթե նստած եմ մի տեղ, որտեղ կարելի է ծխել, ուզում եմ մի հատիկ ծխել։ Տանը, աշխատանքի վայրում, ցերեկվա լույսի տակ չեմ ծխում, մենակ չեմ ծխում, իմ ծխելու տեղն ընկերական շրջապատն է»,-ասաց Հրաչյա Հակոբյանը՝ հավելելով, որ իրեն նույնպես համարում է այսօրվա տրենդի լեզվով ասած վտարանդի։

Հարցին՝ օրինագիծն արդյոք տնտեսական խնդիր չի առաջացնի, Հրաչյա Հակոբյանն արձագանքեց. «Որքանով տեղյակ եմ ծխախոտի ընկերությունները շատ խոշոր արտահանումներ ունեն և ավելի լավ կլինի իրենց արտահանումը մեծացնեն։ Բնականաբար ծխախոտի վաճառքը չի արգելվելու, վաճառվելու տեղերն են սահմանափակվելու, գովազդը պետք է կարգավորվի»,-հավելեց պատգամավորը։

Դիտարկմանն արդյոք գների հետ կապված փոփոխություն կսպասվի, թե ոչ Հրաչյա Հակոբյանը նկատեց, որ ամբողջ աշխարհում ծխախոտի գները տարեցտարի բարձրանում են և դա պատգամավորի կարծիքով նորմալ է. «Ինքս կցանկանամ, որ ծխախոտի գինը տարեցտարի կբարձրանա»,-ասաց պատգամավորը։

Հեղինակ՝ Հասմիկ Կոշկարյան

Աղբյուր` Փաստինֆո